Turizmi rifiton ritmin, hyrjet e shtetasve të huaj rriten me 7.1% në korrik; mbi 7 milionë hyrje nga janari
Turizmi ka shënuar një përshpejtim të ritmit të rritjes në korrik, duke ndryshuar panoramën krahasuar me muajin paraardhës, kur hyrjet e shtetasve të huaj regjistruan një rritje modeste prej vetëm 1.28%. Të dhënat zyrtare për lëvizjen e shtetasve tregojnë se korriku ka shënuar numrin më të lartë të hyrjeve të të huajve për këtë vit, duke arritur 1.95 milionë, kundrejt 1.82 milionë në të njëjtin muaj të vitit të kaluar. Kjo përkthehet në një rritje vjetore prej 7.1%.
Në periudhën janar–korrik 2026, hyrjet e shtetasve të huaj arritën në 7.014 milionë, krahasuar me 6.587 milionë në të njëjtën periudhë të vitit 2025, duke shënuar një rritje prej 6.48%. Rritja më e fortë e regjistruar në korrik ishte e pritshme për operatorët turistikë, të cilët e konsiderojnë muajin gusht, së bashku me korrikun, si kulmin e sezonit veror dhe, në përgjithësi, të vitit.
Qershori, ndërkohë, nuk i plotësoi pritshmëritë, duke u mbyllur me rezervime më të ulëta, veçanërisht nga turistët që kryejnë rezervime në momentin e fundit. Turizmi ka shfaqur një ecuri me luhatje gjatë këtij viti. Ritmet e rritjes kanë variuar nga nivele dyshifrore në disa muaj, në rritje thuajse të papërfillshme në të tjerë, ndërsa gjatë pranverës ecuria u ndikua edhe nga kushtet meteorologjike.
Pritshmëritë për vitin mbeten që sezoni veror të vazhdojë me ritme pozitive, të ngjashme me ato të vitit të kaluar. Operatorët presin që shifrat më modeste të regjistruara në disa muaj të pjesës së parë të vitit të kompensohen nga turizmi i vjeshtës, për të cilin është vërejtur një rritje e vazhdueshme e interesit vitet e fundit.
Të dhënat e INSTAT për lëvizjen e shtetasve:
- Gjatë muajit Korrik 2026, në territorin e Republikës së Shqipërisë kanë hyrë 2.826.615 shtetas shqiptarë dhe të huaj, duke shënuar një rritje prej 6.1% krahasuar me Korrik 2025.
- Gjatë së njëjtës periudhë, nga Shqipëria kanë dalë 2.661.504 shtetas shqiptarë dhe të huaj, me një rritje prej 3.3% krahasuar me vitin e kaluar.
Detajet e hyrjeve dhe daljeve nga Shqipëria në Korrik 2026:
- Hyrjet në Shqipëri:
- Shtetas shqiptarë: 871.516 (rritje me 4.1%)
- Shtetas të huaj: 1.955.099 (rritje me 7.1%)
- Daljet nga Shqipëria:
- Shtetas shqiptarë: 790.261 (rritje me 0.9%)
- Shtetas të huaj: 1.871.243 (rritje me 4.3%)
Rajonet e origjinës dhe qëllimet e hyrjeve të shtetasve të huaj:
- Evropa Jugore kontribuon me 64% dhe Evropa Qendrore/Lindore me 13% të hyrjeve nga Evropa.
- Në 99% të rasteve, shtetasit e huaj hyjnë në Shqipëri për qëllime personale.
- Në Korrik 2026, hyrjet për qëllime personale nga shtetas të huaj kanë shënuar një rritje prej 7.3% krahasuar me Korrik 2025.
- Hyrjet e shtetasve të huaj për qëllime biznesi dhe profesionale kanë pësuar një rënie prej 8.9%.
Burimi: INSTAT