Banka e Shqipërisë ka arritur nivele historike në grumbullimin e rezervave valutore.
Rezervat valutore të Bankës së Shqipërisë kanë arritur shifrën më të lartë historike, duke kapur vlerën e 7.3 miliardë eurove në fund të dhjetorit 2025. Të dhënat zyrtare tregojnë se, krahasuar me fillimin e vitit 2024, kur totali i rezervës ishte 5.6 miliardë euro, kemi një rritje prej më shumë se 30 për qind. Në përbërjen e rezervave vihet re një shtim i dukshëm i arit, i cili ka arritur në 430 milionë euro, nga vetëm 204 milionë në fillim të periudhës së raportimit.
Çfarë domethënie ka kjo?
Kjo rritje reflekton politikën e diversifikimit të aktiveve dhe ruajtjes së sigurisë përballë luhatjeve në tregjet ndërkombëtare. Rritja e rezervave valutore dhe veçanërisht dyfishimi i rezervës së arit monetar, dëshmon një strategji të kujdesshme të Bankës së Shqipërisë për diversifikimin e aktiveve dhe mbrojtjen nga rreziqet globale.
Ari konsiderohet një aset strehë në periudha pasigurie financiare, inflacioni dhe tensione gjeopolitike. Ndaj, rritja e tij synon të ulë varësinë nga valutat dhe tregjet financiare.
Paralelisht, zhvendosja nga letrat me vlerë dhe depozitat valutore tregon orientimin drejt instrumenteve më të sigurta dhe më pak të ekspozuara ndaj luhatjeve të normave të interesit dhe tregjeve.
Forcimi i rezervave valutore rrit aftësinë e bankës qendrore për të:
- stabilizuar kursin e këmbimit,
- përballur goditje të jashtme, dhe
- garantuar mbulimin e importeve dhe detyrimeve të jashtme.
Kjo vepron si një “jastëk financiar” për ekonominë shqiptare, shpjegon Lapsi.al.
Struktura e rezervave tregon gjithashtu një zhvendosje. Letrat me vlerë kanë rënë nga 65.9 miliardë lekë në nëntor 2024 në 58.9 miliardë lekë në nëntor 2025, ndërsa depozitat valutore kanë zbritur nga 127.3 miliardë lekë në 89.6 miliardë lekë.