Shembuj të kompensimit për arsimin e fëmijëve: nga 62 deri në 250 euro
Shumë individë po vazhdojnë të plotësojnë Deklaratën Vjetore të të Ardhurave (DIVA) për të përfituar kompensim për arsimin e fëmijëve. Në bazë të disa shembujve konkretë të publikuar nga Monitor, shuma e kompensimit ndryshon në varësi të të ardhurave vjetore dhe shpenzimeve të zbritura, të cilat varen nga numri i fëmijëve në ngarkim. Gjithashtu, përfshihen shpenzimet fikse për arsim me vlerë maksimale 100,000 lekë, në rastet kur të ardhurat janë nën 1.2 milionë lekë në vit.
- Për individët me të ardhura bruto vjetore mbi 1.2 milionë lekë dhe 1 fëmijë në ngarkim, kompensimi për arsimin është 62 euro në vit.
- Në rastin e individëve me të ardhura mbi 2 milionë lekë në vit dhe dy fëmijë në ngarkim nën 18 vjeç, pas zbritjes së shpenzimeve për fëmijët (96,000 lekë), tatimi i mbipaguar ose kompensimi arrin rreth 12,000 lekë.
- Për individët që paguhen mbi 200,000 lekë në muaj dhe ku tatimi arrin 23%, kompensimi është 11,040 lekë për fëmijë.
- Shuma maksimale e kompensimit sipas shembujve të publikuar, arrin deri në 250 euro për individët me të ardhura nën 1.2 milionë lekë në vit, të cilët përfitojnë edhe zbritje për fëmijët në ngarkim dhe shpenzime arsimore deri në 100,000 lekë.
Individët që rezultojnë me tatim të mbipaguar, pas plotësimit të DIVA-s brenda 3 muajve pas përfundimit të afatit të deklarimeve, do të dorëzojnë kërkesën pranë Drejtorisë së Përgjithshme të Tatimeve për të përfituar kompensimin. Procedura për dorëzimin e këtyre kërkesave pritet të sqarohet nga tatimet.
Shembull 1: Të ardhura mbi 1.2 milionë lekë në vit, 1 fëmijë në ngarkim
Individi A, me të ardhura vjetore prej 1,470,000 lekë për vitin 2025, ka paguar 144,424 lekë tatim gjatë vitit. Pas zbritjeve të lejuara, duke përfshirë zbritjen nga të ardhurat nga punësimi (360,000 lekë në vit) dhe kompensimin për fëmijën nën 18 vjeç (48,000 lekë), baza e të ardhurave të tatueshme arrin 1 milionë lekë. Tatimi i llogaritur për këtë bazë është 138,184 lekë. Tatimi i mbipaguar rezulton në 6,240 lekë (144,424 lekë – 138,184 lekë).
Shembull 2: Të ardhura mbi 2.2 milionë lekë në vit, 2 fëmijë në ngarkim
Për të ardhura vjetore bruto prej 2,232,140 lekë, tatimi i paguar për vitin 2025 ishte 255,796 lekë. Individi ka dy fëmijë nën 18 vjeç dhe përfiton zbritje shpenzimesh prej 96,000 lekë. Pas zbritjes, tatimi i ri i llogaritur është 243,391 lekë. Tatimi i mbipaguar ose kompensimi arrin 12,405 lekë (255,796 lekë – 243,391 lekë).
Shembull 3: Të ardhura nën 1.2 milionë lekë në vit, 2 fëmijë në ngarkim
Individi C, me të ardhura bruto vjetore prej 1,189,374 lekë për vitin 2025, ka paguar 107,820 lekë tatim. Individi ka dy fëmijë (5 dhe 9 vjeç), ku njëri ndjek arsimin fillor në shkollë private. Përveç zbritjes së shpenzimeve për fëmijët në ngarkim (96,000 lekë), individi përfiton edhe zbritje shpenzimi prej 100,000 lekë për arsimin, pasi të ardhurat janë nën 1.2 milionë lekë në vit dhe disponon dokumentacionin justifikues (faturat e shkollës private). Pas vendosjes së këtyre të dhënave, sistemi ka gjeneruar automatikisht tatimin e mbipaguar ose kompensimin në vlerën prej 25,481 lekë.
Konkretisht, individi ka përfituar:
- Zbritje nga të ardhurat nga punësimi: 360,000 lekë.
- Shumë kompensimi për çdo fëmijë në ngarkim nën 18 vjeç: 96,000 lekë (kjo shumë u gjenerua automatikisht nga sistemi bazuar në numrin e fëmijëve).
- Shpenzime për arsimin e fëmijëve: 100,000 lekë (vlera u shtua nga deklaruesi, pasi disponon dokumentacionin justifikues dhe të ardhurat bruto vjetore janë nën 1.2 milionë lekë).
Pas zbritjes së shpenzimeve, totali i të ardhurave bruto arrin 633,374 lekë. Tatimi i rillogaritur pas zbritjes është 82,339 lekë. Tatimi i mbipaguar rezulton të jetë 25,481 lekë (107,820 lekë – 82,339 lekë).