Inspektori i Lartë i Drejtësisë nis shqyrtimin e dosjes për gjyqtaren e GJKKO, Irena Gjoka
Inspektori i Lartë i Drejtësisë (ILD) ka filluar shqyrtimin e dosjes së mbërritur nga Këshilli i Lartë Gjyqësor (KLGJ) për gjyqtaren e Gjykatës së Posaçme, Irena Gjoka. Dosja ka të bëjë me dënimin e saj në Greqi dhe deklarimet e bëra në formularin e dekriminalizimit.
Pak ditë më parë, KLGJ vendosi me shumicë votash që procedura për verifikimin e gjyqtares të mos zhvillohej në këtë institucion, por dosja t’i kalonte ILD-së, si organit më kompetent për këtë rast.
Çështja lidhet me raportin e Prokurorisë së Përgjithshme, i cili ngre dyshime se gjyqtarja e GJKKO-së ka bërë deklarime të pasakta në formularin e dekriminalizimit, duke mos përmendur dënimin dhe dëbimin nga Greqia. Sipas raportit, një pjesë e anëtarëve të KLGJ kërkuan nisjen e procedurave për shkarkimin e saj, ndërsa shumica preferoi që çështja të shqyrtohej nga ILD.
Problematika u bë publike fillimisht pas publikimeve në mediat greke dhe dokumenteve të siguruara më pas nga mediat shqiptare. Këto publikime raportuan se gjyqtarja kishte qenë pjesë e një procesi gjyqësor në Greqi për përdorim dokumentesh të falsifikuara dhe kishte autorizuar një avokat për të kundërshtuar masat ndaj saj.
Irena Gjoka ka qenë në qendër të vëmendjes publike edhe për rolin e saj në disa procese të rëndësishme të Gjykatës së Posaçme, duke e kthyer këtë çështje në një debat politik dhe institucional.
Ndërkohë, shqyrtimi nga ILD pritet të përcaktojë nëse do të ketë apo jo procedim disiplinor ndaj gjyqtares.