“`html
KPP e mban të pezulluar tenderin 7.7 milionë euro për sistemin e fiskalizimit
Komisioni i Prokurimit Publik (KPP) ka vendosur të mos heqë pezullimin për procedurën e prokurimit publik të titulluar “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve”. Arsyeja e këtij vendimi është mosplotësimi i të gjitha kërkesave nga ana e autoritetit kontraktor.
Në një vendim të mëparshëm, KPP kishte kërkuar një sërë ndryshimesh që duhet të reflektoheshin në sistem për këtë procedurë, e cila ka një fond limit prej 7.7 milionë euro. Autoritet përgjegjës për këtë procedurë është Agjencia Kombëtare e Shoqërisë së Informacionit (AKSHI). Një ankesë e paraqitur nga një prej operatorëve ka sjellë sërish këtë procedurë nën pezullim, duke zgjatur afatin për marrjen e këtij shërbimi, ndërkohë që procedura ka nisur që nga prilli i vitit të kaluar.
Gjatë shqyrtimit të ankesës, KPP vendosi që pezullimi të mbetet në fuqi dhe autoriteti kontraktor të mos vijojë me hapat e mëtejshëm të procedurës. Ndryshe nga kjo procedurë, KPP ka hedhur poshtë një ankimim tjetër që lidhej me shërbimin e internetit për institucionet.
Tenderët që kanë të bëjnë me teknologjinë dhe informacionin janë kthyer në një nga problemet kryesore në fushën e prokurimeve. Këto probleme rrezikojnë në disa raste mosmarrjen në kohë të shërbimeve ose shpenzime më të larta për autoritetet, për shkak të nevojës për të marrë masa emergjente për vijimin e shërbimeve.
Një nga këto probleme duket se ka prekur edhe sistemin e “Self Care” të Tatimeve, i cili prej javësh tashmë nuk është në gjendje të ofrojë shërbim të vazhdueshëm për bizneset. Kjo situatë është ankimuar thuajse çdo ditë nga subjektet e prekura.
Tenderi për sistemin e fiskalizimit
Tenderi me objekt “Mirëmbajtje e Modulit te Menaxhimit te Kontrollit te Faturimit per Drejtorinë e Përgjithshme te Tatimeve” u shpall në prill të këtij viti. Sipas dokumenteve shoqëruese, qëllimi kryesor i këtij projekti është mirëmbajtja e sistemit të Menaxhimit të Kontrollit të Faturimit (sistemi i fiskalizimit) për Drejtorinë e Përgjithshme të Tatimeve për një periudhë prej 24 muajsh.
“Qëllimi është garantimi i funksionimit të plotë të sistemit elektronik, në të gjithë komponentët e tij: softuer dhe pajisje fizike (hardware). Ky sistem është i hostuar në Qendrën e të Dhënave Qeveritare, pranë Agjencisë Kombëtare të Shoqërisë së Informacionit (AKSHI), dhe ofron shërbime për rreth 125 mijë tatimpagues, si dhe për vetë administratën tatimore”, thuhet në dokumente.
Dokumentacioni thekson se disponueshmëria e sistemit të fiskalizimit është shumë e rëndësishme. Shërbimi i fiskalizimit dhe portali i tatimpaguesve (SelfCare) nuk mund të pësojnë ndërprerje për më shumë se disa minuta dhe nuk tolerohen ndërprerje të planifikuara për qëllime përditësimi (upgrade, update) apo modifikime të tjera.
“Shërbimet e ofruara për tatimpaguesit (fiskalizimi, verifikimi i faturave, pranimi/refuzimi i tyre, etj.), si dhe për administratën tatimore, duhet të jenë funksionale 24 orë në ditë, 7 ditë në javë,” theksohet më tej.
Aktualisht, ky sistem përdoret nga bizneset dhe qytetarët, ndërsa në përdorim të brendshëm është i aksesueshëm nga administrata tatimore dhe institucione të tjera publike të autorizuara. Dokumentet e tenderit përshkruajnë kërkesat dhe përgjegjësitë për mirëmbajtjen e sistemit të fiskalizimit.
“`