Në Holandë, Mbretëresha Máxima fillon stërvitjen ushtarake për t’u bashkuar me rezervën e Forcave të Armatosura
Mbretëresha Máxima e Holandës ka nisur këtë javë një proces trajnimi me qëllim bashkimin me rezervën e Forcave të Armatosura holandeze. Ky veprim vjen në një periudhë kur ushtria holandeze po synon të forcojë kapacitetet e saj, duke pasur parasysh tensionet e shtuara gjeopolitike në Evropë.
Mbretëresha, 54-vjeçare, e lindur në Argjentinë dhe bashkëshorte e Mbretit Willem-Alexander, e filloi zyrtarisht trajnimin të mërkurën, sipas një njoftimi nga Ministria Holandeze e Mbrojtjes.
Në një deklaratë zyrtare, theksohet se, “duke qenë se siguria e Holandës nuk mund të merret më si e mirëqenë, Máxima ka vendosur të bashkohet me rezervën”. Ky është pjesë e një përpjekjeje më të gjerë për forcimin e mbrojtjes kombëtare.
Mbretëresha pritet të bëjë betimin më vonë gjatë këtij muaji. Vendimi vjen pasi qeveria e re e koalicionit ka shpallur plane për rritjen e numrit të personelit ushtarak nga rreth 80,000 në 122,000 ushtarë.
Ky përforcim lidhet drejtpërdrejt me paqëndrueshmërinë gjeopolitike dhe luftën në Ukrainë, të cilat kanë rritur shqetësimet për sigurinë në kufijtë lindorë të Evropës.
Shtëpia Mbretërore e Orange ka theksuar se Mbretëresha Máxima, “ashtu si shumë qytetarë të tjerë, dëshiron të kontribuojë në sigurinë e vendit”.
Ky vendim vjen pas përfundimit të muajit të kaluar të stërvitjes bazë ushtarake nga Princesha Amalia, trashëgimtarja e fronit holandez, e cila u bashkua me rezervën si vullnetare.
Zëdhënësi i Ministrisë së Mbrojtjes, Klaas Meyer, e ka vlerësuar këtë hap, duke theksuar se përfshirja e Mbretëreshës është një zgjedhje personale. “Jemi shumë krenarë për këtë vendim dhe shpresojmë që të frymëzojë edhe qytetarë të tjerë që të mendojnë se edhe ata mund të kontribuojnë”, u shpreh ai.
Sipas Ministrisë së Mbrojtjes, programi i trajnimit të Mbretëreshës do të përfshijë lëndë teorike dhe praktike, si:
- Qëndrueshmëri fizike
- Vetëmbrojtje
- Qitje
- Lexim hartash
- Njohuri mbi ligjin ushtarak
Pas përfundimit të trajnimit, Mbretëresha Máxima pritet të marrë gradën e nënkolonelit dhe do të jetë e gatshme të dislokohet në rast nevoje.
Përfshirja e anëtarëve të familjeve mbretërore në forcat e armatosura është një traditë e hershme në Evropë, e cila vitet e fundit është zgjeruar edhe për gratë. Një shembull i tillë është Princesha Elisabeth e Belgjikës, e cila pesë vjet më parë ndoqi një shkollë ushtarake në Bruksel si pjesë e përgatitjes së saj për detyrat e ardhshme mbretërore.