“`html
Rreth 40 vite nga aplikimi për t’u bashkuar, Erdogan: Anëtarësimi në BE nuk përbën më prioritet për Turqinë
Anëtarësimi i Turqisë në Bashkimin Evropian “nuk përbën më prioritet” për Ankaranë, deklaroi presidenti turk Recep Tayyip Erdogan. Ai argumentoi se në rast të një zhvillimi të tillë, “humbëse do të jetë Evropa”.
Në një intervistë, presidenti turk trajtoi një sërë çështjesh kritike, duke përfshirë marrëdhëniet me BE-në dhe programin F-35, si dhe marrëveshjen e re të mbrojtjes në Mekë mes Turqisë, Arabisë Saudite dhe Pakistanit, situatën në Egjipt, Ngushticën e Hormuzit, Siri dhe Gaza.
Erdogan u shpreh se Bashkimi Evropian nuk duket i gatshëm ta pranojë Turqinë si anëtare të plotë. Gjithashtu, ai theksoi se anëtarësimi në BE nuk është më në krye të axhendës së Ankarasë.
Presidenti turk iu referua gjithashtu Marrëveshjes së Përbashkët të Mbrojtjes, të nënshkruar më 7 gusht nga Turqia, Arabia Saudite dhe Pakistani në Mekë. Kjo marrëveshje parashikon që një sulm i armatosur kundër njërit prej tre vendeve do të konsiderohet sulm kundër të gjithëve. Ai argumentoi se kjo marrëveshje “i dërgoi një mesazh të rëndësishëm botës”.
Turqia aplikoi zyrtarisht për anëtarësim të plotë në Komunitetin Ekonomik Evropian (tani Bashkimi Evropian) më 14 prill 1987.
“`