Përmbytje rekord në Francë, alarm në disa rajone të vendit
Autoritetet po paralajmërojnë për një “përmbytje të përhapur” në disa pjesë të Francës, sipas shërbimit kombëtar të monitorimit të përmbytjeve Vigicrues. Nivelet e lagështisë së tokës kanë arritur nivele të papara, duke bërë që toka të mos jetë më në gjendje të thithë ujë shtesë.
Lumi Garonne ka dalë nga shtrati në disa zona të Francës jugperëndimore, pas ngjarjeve ekstreme të motit, përfshirë stuhinë e dhunshme Nils, e cila preku Francën dhe Spanjën të enjten.
Nivelet e përmbytjeve arritën kulmin të shtunën dhe të dielën në departamentet Gironde dhe Lot-et-Garonne. Megjithatë, Vigicrues ka paralajmëruar se lumi mund të vazhdojë të përmbytet në orët në vijim dhe mund të rritet përsëri këtë javë për shkak të motit të keq.