Kalimi i truallit shtetëror në pronësi: Kadastra sqaron dy kategoritë përfituese
Agjencia Shtetërore e Kadastrës (ASHK) ka informuar qytetarët se, pas miratimit të Vendimit të Këshillit të Ministrave (VKM) nr. 4, datë 15.01.2026, janë përcaktuar qartësisht rregullat dhe procedurat për kalimin e truallit shtetëror në pronësi. Ky proces synon të garantojë transparencë, siguri juridike dhe trajtim të barabartë për të gjithë aplikantët.
Aplikimi kryhet nëpërmjet platformës shtetërore e-Albania, ndërsa dokumentacioni ngarkohet elektronikisht dhe më pas depozitohet pranë Drejtorisë Vendore të ASHK-së përkatëse. Qëllimi kryesor i këtij vendimi është reduktimi i burokracisë, rritja e transparencës dhe forcimi i sigurisë juridike.
Vendimi i miratuar trajton dy kategori kryesore përfituesish:
- Kategoria e parë: Ndërtesat e privatizuara sipas ligjeve nr. 7512, datë 15.08.1991 dhe nr. 7476, datë 12.03.1991. Për këto raste, kushtet themelore janë që ndërtesa të jetë fituar me kontratë privatizimi nga organi shtetëror përkatës, trualli të jetë pronë shtetërore (dhe jo tokë publike e patjetërsueshme) si dhe pasuria të jetë në posedim të kërkuesit. Një element thelbësor është edhe shlyerja e detyrimeve për taksën e truallit në përdorim.
- Kategoria e dytë: Ndërtesat me leje ndërtimi të lëshuar pas datës 10.08.1991. Në këto raste, trualli duhet të jetë pronë shtetërore, të mos ekzistojë dokumentacion i mëparshëm për dhënien e tij në përdorim dhe të jenë përmbushur të gjitha detyrimet financiare përkatëse.
Në të dyja kategoritë, sipërfaqja që kalon në pronësi përcaktohet sipas planit rregullues (genplanit) përkatës ose, në mungesë të tij, sipas sipërfaqes së zënë nga objekti. Kërkesa paraqitet online, ndërsa dokumentacioni përkatës ngarkohet në format PDF dhe më pas depozitohet me postë pranë Drejtorisë Vendore të ASHK-së që administron zonën ku ndodhet pasuria.
Ky standardizim synon të shmangë paqartësitë dhe të përshpejtojë shqyrtimin e aplikimeve, duke e bërë procesin më të sigurt dhe më të parashikueshëm për qytetarët.
Pagesa për kalimin e pronësisë:
- Për objektet me funksion banimi, kalimi i truallit realizohet pa pagesë.
- Për objektet me funksion social-ekonomik, kalimi bëhet me pagesë, sipas çmimit të miratuar në hartën e vlerës së tokës.
- Në rastet me funksion të përzier, pagesa aplikohet vetëm për pjesën e përdorur për veprimtari ekonomike.
Kategoritë që nuk trajtohen nga ky VKM:
Për transparencë të plotë, vendimi nuk përfshin objektet e privatizuara sipas ligjit nr. 7652, datë 23.12.1992 “Për privatizimin e banesave shtetërore”, si dhe rastet që lidhen me privatizimin e objekteve të ish-ndërmarrjeve bujqësore sipas ligjit nr. 18/2023.
Me këtë vendim, procesi i kalimit në pronësi të truallit shtetëror bëhet më i thjeshtë në aplikim, më i qartë në rregulla dhe më i sigurt në zbatim, duke konsoliduar një hap tjetër drejt formalizimit të pasurive.