Rumania në alarm: Dëbora bllokon transportin ajror dhe rrugor
Reshjet e dendura të borës dhe stuhitë e forta kanë shkaktuar kaos në disa rajone të Rumanisë. Situata ka bllokuar trafikun ajror dhe rrugor, ka çuar në mbylljen e shkollave dhe ka lënë pa energji elektrike mbi 166 mijë familje. Autoritetet kanë shpallur alarm të kuq për zonat qendrore, jugore dhe lindore të vendit.
Meteorologia Florinela Georgescu për Digi24 thekson se bëhet fjalë për një nga episodet më të rënda të dimrit aktual.
Detaje nga situata:
- Ndërprerje energjie janë raportuar në 205 lokalitete në dhjetë qarqe. Shërbimet e emergjencës po punojnë intensivisht për rikthimin e furnizimit me energji.
- Situata është veçanërisht e rënduar në kryeqytetin Bukuresht, ku transporti publik është ndërprerë dhe trenat që mbërrijnë në stacionin kryesor po regjistrojnë vonesa mbi gjashtë orë, sipas raportimeve të AFP.
- Në Aeroportin Ndërkombëtar Henri Coandă, deri në orën 11:00 GMT nuk u nis asnjë fluturim. Tetë fluturime u anuluan, pesë u devijuan dhe dy pista u mbyllën për shkak të një shtrese bore rreth 30 centimetra.
- Ekipet e shpëtimit në kryeqytet kanë ndërhyrë për të larguar 241 pemë dhe 18 shtylla elektrike të rrëzuara nga pesha e borës, si dhe për të zhbllokuar automjete të mbetura në rrugë.
- Qendra e Informacionit të Trafikut njoftoi gjithashtu mbylljen e disa segmenteve autostradash dhe rrugësh kombëtare në disa qarqe.
Shërbimi Kombëtar Meteorologjik ka lëshuar paralajmërime urgjente, ndërsa Departamenti i Emergjencës ka aktivizuar sistemin e njoftimeve për popullatën, duke u bërë thirrje qytetarëve të shmangin udhëtimet e panevojshme.
Fenomeni ekstrem ka prekur 67 zona në 21 qarqe dhe kryeqytetin. Në zonat malore, reshjet kanë qenë edhe më intensive:
- Në Bâlea Lac u regjistruan 162 cm borë.
- Në Semenic mbi 140 cm.
- Në Sinaia u matën 64 cm.
- Në Predeal rreth 40 cm.
- Në Braşov rreth 35 cm.
Në jug të vendit trashësia e borës varionte nga 18 deri në 30 cm, ndërsa rajoni i Moldavisë regjistroi reshje të moderuara.
Autoritetet paralajmërojnë se kushtet e motit pritet të mbeten të vështira edhe në orët në vijim dhe u bëjnë thirrje qytetarëve të tregojnë kujdes maksimal.