“`html
Si të deklaroni fitimet nga Airbnb dhe Instagram: Tatim 15% mbi të ardhurën neto
Nëse jeni individ dhe nuk posedoni një numër identifikimi tatimor (NIPT) për biznes, por gjatë vitit keni gjeneruar të ardhura mbi 50 mijë lekë nga dhënia me qira e apartamenteve ose vilave përmes platformave si Airbnb apo Booking, këto të ardhura konsiderohen si të pa tatuara nga administrata tatimore. Për pasojë, ato duhet të deklarohen në Formularin e Deklaratës Vjetore të të Ardhurave Personale (DIVA) dhe do të tatohen me 15%.
Të ardhurat e gjeneruara përmes rrjeteve sociale ose platformave të tjera të huaja do të deklarohen në të njëjtin formular si të ardhurat nga marrëdhëniet e punësimit.
Kontabilistët sqarojnë se në DIVA do të deklarohet e ardhura e mbetur pas zbritjes së komisioneve. Pas shënimit manual të kësaj shume nga deklaruesi, sistemi do të llogarisë automatikisht tatimin 15%.
Aktualisht, shumë individë që kanë gjeneruar të ardhura të pa tatuara përmes platformave të huaja po përballen me paqartësi rreth mënyrës së deklarimit: nëse duhet të deklarohet shuma para apo pas komisionit të paguar platformës.
Interpretimi fiskal në DIVA, në përgjithësi, i referohet vetëm “të ardhurës bruto nga qiraja” ose “të ardhurave bruto të tjera të papërmendura më lart të realizuara jashtë territorit të Republikës së Shqipërisë”. Megjithatë, konkretisht në DIVA nuk parashikohen zbritje shpenzimesh për komisionet e platformave për të ardhurat e këtyre individëve.
Kontabilisti Armand Mala shpjegon për “Monitor” se edhe pse DIVA i referohet të ardhurës bruto nga qiraja, individët duhet të deklarojnë të ardhurën neto, pra atë që ka mbetur pas komisioneve, pasi kjo është shuma që korrespondon me pagesat e arkëtuara përmes bankës.
Deklarimi në DIVA është i domosdoshëm edhe për të ardhurat e gjeneruara nga rrjetet sociale si Facebook, Instagram apo YouTube, të cilat gjithashtu konsiderohen të pa tatuara për shkak se individët nuk janë të regjistruar me NIPT. Pra, pavarësisht se të ardhurat janë realizuar përmes platformave të huaja, ato konsiderohen të ardhura të pa tatuara të një individi që nuk posedon NIPT, duke i lindur detyrimi për t’i deklaruar përmes DIVA dhe për të paguar tatimin 15%.
Sipas njoftimit të mëparshëm të Administracionit Tatimor, çdo person që ka përfituar të ardhura si individ nga platforma si Meta, YouTube, Google, Airbnb, Booking, etj., dhe i ka arkëtuar ato në bankë ose përmes PayPal, duhet t’i deklarojë në formularin DIVA-2025, brenda datës 31 Mars 2026.
Armand Mala sqaron se në formularin DIVA, të ardhurat e pa tatuara mbi 50 mijë lekë në vit nga qiradhënia përmes platformave të huaja duhet të pasqyrohen te Rubrika 6 “Të ardhura nga dhënia me qira”. Të ardhurat nga rrjetet sociale, sipas Malës, duhet të deklarohen në rubrikën (21) “Të ardhura bruto të tjera të papërmendura më lart të realizuara jashtë territorit të Republikës së Shqipërisë”.
Si llogaritet tatimi?
- Për të dyja rastet, vlera e të ardhurës së pa tatuar duhet të shënohet manualisht nga deklaruesi.
- Tatimi është 15%.
- Sistemi e-Filing e llogarit automatikisht tatimin, pasi shuma të jetë futur manualisht nga deklaruesi.
- Shuma e deklaruar do të tatohet plotësisht, pasi ligji nuk parashikon zbritje shpenzimesh për këto lloje të ardhurash.
Zbritje shpenzimesh parashikohen vetëm për të ardhurat nga punësimi, sipas nenit 22, pika 1, germat a, b dhe c të ligjit “Për tatimin mbi të ardhurat”, duke qenë të reflektuara në rubrikën 24 të DIVA-s. Gjithashtu, zbritje shpenzimesh përfshijnë kompensimin për çdo fëmijë në ngarkim (nën 18 vjeç) prej 48 mijë lekë dhe shpenzimet për arsimin e fëmijëve deri në 100 mijë lekë, të përcaktuara në rubrikat 25 dhe 26 të DIVA-s.
Kur filloi detyrimi i deklarimit për të ardhura të pa tatuara mbi 50 mijë lekë në vit?
Detyrimi i deklarimit edhe për të ardhurat mbi 50 mijë lekë në vit, për të cilat nuk është mbajtur tatim përfundimtar në burim, duke përfshirë edhe ato të realizuara përmes platformave ndërkombëtare, u përfshi si risi në vitin 2025, me plotësimin e DIVA 2024. Këto ndryshime sollën që edhe individët që nuk kishin realizuar një total të ardhurash vjetore mbi 1,2 milionë lekë nga punësimi (vetëm në këtë rast individi ka detyrim për plotësimin e DIVA-s), por kishin gjeneruar të ardhura të pa tatuara mbi 50 mijë lekë në vit nga qiraja, YouTube etj., t’u lindte detyrimi për plotësimin e DIVA-s.
Të ardhurat e tilla mund të përfshijnë:
- Të ardhurat nga qiradhënia, kur qiramarrësi është një individ i paregjistruar si tatimpagues tregtar.
- Të ardhura të realizuara jashtë Shqipërisë.
Ndërkohë, për shkak të kërkesës në rritje të turistëve të huaj për akomodim në apartamente me qira ditore, pasi çmimet janë më të lira se strukturat tradicionale, numri i tyre vijon të rritet.
Në vitin 2025, nga qiradhënia në Shqipëri u gjeneruan gjithsej 134 milionë euro. Të dhënat nga AirDNA, një njësi analitike e platformave si Airbnb dhe Expedia (si dhe në disa raste Booking.com), tregojnë se në të gjithë vendin, mesatarisht në vitin 2025, jepeshin me qira 26.3 mijë apartamente përmes Airbnb, nga 21 mijë vitin e mëparshëm, duke shënuar një rritje prej 25.3%. Të ardhurat nga qiradhënia në Shqipëri për vitin 2025 arritën një nivel rekord prej 134 milionë eurosh, me një rritje prej 23.4% krahasuar me vitin paraardhës.
Megjithatë, një pjesë e këtyre individëve nuk janë të regjistruar pranë tatimeve, duke nxitur administratën tatimore të ndërmarrë disa herë masa për evidentimin dhe fiskalizimin e këtij aktiviteti informal. Për identifikimin e individëve që lëshojnë prona me qira ditore dhe formalizimin e tyre, tatimet kanë nisur identifikimin përmes komisioneve të paguara në platformën Booking. Më herët, administrata tatimore ka bërë të ditur se po hartohet një projekt pilot për evidentimin e këtyre të dhënave nëpërmjet përfaqësuesve tatimorë në Shqipëri, të cilët japin prona me qira në platformat Booking apo Airbnb. Projekti parashikonte kryqëzimin e numrit të qiradhënësve të identifikuar përmes komisioneve me të dhënat nga deklarimet në Deklaratën Individuale Vjetore të të Ardhurave (DIVA) për vitin 2024, me qëllim aplikimin e tatimit 15% në burim për të ardhurat e pa tatuara.
“`