Merz do të udhëtojë në Uashington për të diskutuar tarifat me Trump
Kancelari gjerman Friedrich Merz ka njoftuar se do të vizitojë Uashingtonin për të diskutuar me Presidentin e SHBA-së, Donald Trump, çështjen e tarifave amerikane.
Në një intervistë për ARD, pas konventës së Unionit Kristian Demokrat në Stuttgart, Merz e cilësoi si “interesant” vendimin e Gjykatës Supreme të SHBA-së, e cila ka vënë në dukje kufijtë e kompetencave të administratës amerikane në politikën doganore. Ai theksoi se vendimi nuk prek tarifat sektoriale, por normën e përgjithshme tarifore.
Merz deklaroi se para takimit me Trump, do të zhvillojë konsultime me Bashkimin Evropian për të hartuar një “qëndrim absolutisht të qartë evropian”, duke nënvizuar se politika doganore është kompetencë e BE-së dhe jo e shteteve anëtare individuale.
“Para së gjithash, këto tarifa dëmtojnë vendin që i vendos ato,” tha ai, duke shtuar se në fund konsumatorët amerikanë do të përballen me çmime më të larta.
Sipas gazetës Bild, vizita e kancelarit në SHBA pritet të zhvillohet në fillim të marsit, me takimin me Trump të planifikuar për 3 mars.