IHÇK 2,3% në janar 2026, rritje e fortë e çmimeve për argëtimin dhe ushqimet
Inflacioni, i matur me Indeksin e Harmonizuar të Çmimeve të Konsumit (IHÇK) sipas metodologjisë së Eurostat, arriti në 2,3% në janar 2026. Kjo shifër u publikua nga Instituti i Statistikave.
Krahasuar me muajin dhjetor, çmimet e konsumit u rritën me 0,6%, duke treguar një presion të moderuar mbi kostot e jetesës në fillim të vitit.
Sipas të dhënave zyrtare:
- Rritja më e madhe vjetore e çmimeve u regjistrua në grupin “Argëtim, sport dhe kulturë”, me 9,8%, duke qenë kontribuuesi kryesor në inflacionin e muajit.
- Nivele më të larta se mesatarja shënuan edhe “Kujdesi personal, mbrojtja sociale dhe mallra e shërbime të ndryshme” me 3,7%.
- Gjithashtu, “Pije alkoolike dhe duhan” dhe “Sigurime dhe shërbime financiare” patën një rritje prej 3,1% secila.
- Rritje prej 2,3% shënuan “Ushqime dhe pije joalkoolike”, ndërsa shërbimi arsimor u rrit me 2,2%.
- Çmime më të larta u evidentuan gjithashtu në:
- Mobilje dhe mirëmbajtje shtëpie, si dhe në restorante dhe akomodim me nga 2,0%.
- Shëndet me 1,1%.
- Veshje dhe këpucë me 0,9%.
- Qira dhe energji me 0,7%.
- Informacion dhe komunikim me 0,6%.
- Transporti ishte i vetmi grup që shënoi ulje, me -0,7% në terma vjetorë.
Në planin mujor, rritja prej 0,6% u ndikua kryesisht nga shtrenjtimi i sigurimeve dhe shërbimeve financiare me 2,8%, i ndjekur nga argëtimi dhe kultura me 1,6% dhe ushqimet me 1,3%. Shtimi i çmimeve u regjistrua edhe te kujdesi personal me 0,9% dhe te pijet alkoolike e duhani me 0,6%.
Në të kundërt, qiratë dhe energjia shënuan ulje mujore me 0,7%, ndërsa veshjet e këpucët dhe restorantet e akomodimi pësuan rënie më të lehta.
INSTAT informon se duke filluar nga shkurti 2026, indeksi do të përllogaritet sipas klasifikimit të ri ECOICOP 2018, në përputhje me rregulloren e Bashkimit Europian. Ky ndryshim përfshin përditësimin e peshave, rishikimin e shportës së konsumit me 410 produkte dhe ndryshimin e vitit bazë në 2025=100.
Indeksi i Harmonizuar i Çmimeve të Konsumit (IHÇK) mat ndryshimin e nivelit të çmimeve me pakicë të mallrave dhe shërbimeve, duke u bazuar në strukturën e shpenzimeve që konsumatorët (vendas dhe të huaj) synojnë për konsumin final në territorin e Shqipërisë. IHÇK përdoret për monitorimin e lëvizjes së çmimeve me pakicë në vendet Evropiane, krahasimin e përqindjes së inflacionit mes vendeve evropiane dhe si inflacion zyrtar i Bankës Qendrore Evropiane, duke siguruar stabilitetin e çmimeve në Bashkimin Ekonomik dhe Monetar.