“`html
Me vetëm 2% të aksioneve, 2A Group ndërmerr një tjetër veprim për bllokimin e Aeroportit të Vlorës.
Kompania 2A Group, e cila zotëron vetëm 2% të aksioneve në koncesionin e Aeroportit Ndërkombëtar të Vlorës, ka ndërmarrë një veprim të hapur presioni duke ndaluar aksesin në ambientet e terminalit për drejtuesin e një grupi punëtorësh të një kompanie nënkontraktore të MABCO-s. MABCO është aksioneri që zotëron 98% të projektit dhe financon ndërtimin e tij.
Ky veprim shihet si përpjekja më e fundit për të bllokuar punimet në projektin strategjik për turizmin. Ngjarja vjen pas konfliktit mes aksionerëve, i cili filloi me rastin e rrafshimit të një zone kodrinore në fshatin Mifol, pranë aeroportit, për mbushjen e pistës pa lejet përkatëse.
Banorët e Mifolit reaguan fuqishëm, duke bërë ankesa, të cilat u pasqyruan edhe në media.
Pas reagimit, Inspektorati Kombëtar i Mbrojtjes së Territorit ndërhyri, ndaloi aktivitetin dhe gjobiti kompaninë 2A Group për shkelje. Megjithatë, në vend që përgjegjësia të mbyllej me sanksionin administrativ, konflikti mori një tjetër drejtim.
Para dy ditësh, 2A Group ndaloi hyrjen në terminal për z. Aldi Boriçi, drejtues i një sektori të një kompanie nënkontraktore të MABCO-s. Arsyeja e dhënë ishte se ai “ka dëmtuar mediatikisht VIA-n” duke mbështetur publikisht banorët në kundërshtimin e tyre për marrjen e dheut.
Në thelb, pas një shkeljeje të konstatuar dhe të ndëshkuar nga autoritetet shtetërore, masa ndëshkuese nuk bie mbi aktin e paligjshëm, por mbi një përfaqësues të palës që financon dhe mban peshën kryesore të investimit.
Veprimi merr një dimension edhe më të rëndë duke marrë parasysh situatën e brendshme të projektit. Edhe pse zotëron vetëm 2% të aksioneve, 2A Group ka arritur të marrë kontrollin administrativ të aeroportit përmes vendimeve gjyqësore, të cilat janë kontestuar dhe për të cilat janë depozituar ankesa në Inspektoriatin e Lartë të Drejtësisë.
Në praktikë, këto vendime kanë krijuar një situatë paradoksale: aksioneri minoritar ushtron kontroll faktik mbi kantierin, deri në veprime abuzive, ndërsa aksioneri mazhoritar, që mban 98% të aksioneve dhe financimin e projektit, përballet me kufizime operative në terren.
Ky bllokim i punimeve për arsye “mediatike” ngre pikëpyetje serioze për mënyrën se si po administrohet aeroporti. Në vend që konflikti të zgjidhet në rrugë institucionale dhe sipas peshës reale të kapitalit, ai po drejtohet drejt veprimeve abuzive, që shkaktojnë vonesa dhe përpiqen të paralizojnë funksionimin normal të punimeve.
Pyetja mbetet e hapur: Si është e mundur që në një investim ku 98% e kapitalit dhe riskut mbahen nga një kompani, kontrolli praktik mbi territorin dhe aksesin në kantier të ushtrohet nga pala që zotëron vetëm 2%? Mos ndoshta qëllimi real është bllokimi total i punimeve te aeroportit?
Përgjigjia e kësaj pyetjeje shkon përtej përplasjes mes dy aksionerëve. Ajo prek thelbin e funksionimit të rendit juridik dhe të sigurisë së investimeve në një projekt që është shpallur strategjik dhe që përfaqëson një nga ndërhyrjet më të mëdha infrastrukturore në jug të vendit.
Më poshtë është teksti i emailit të Vegim Hoxhës, administrator i emëruar nga kompania me 2% të projektit, i cili urdhëron ndalimin në ambientet e aeroportit të kompanisë nënkontraktore të MABCO, pronare e 98% të aksioneve.
From: Vegim Hoxha <>
Date: Tue, Feb 24, 2026 at 2:24 PM
Subject: Njoftim mbi ndalimin e hyrjes dhe operimit – Z. Aldi Boriçi
To: Sazan Gorishova <>
I nderuar z. Sazan Gorishova,
Në cilësinë e Administratorit të shoqërisë Vlora International Airport sh.p.k. (VIA), ju njoftoj se është vendosur ndalimi i menjëhershëm i hyrjes dhe operimit të z. Aldi Boriçi në ambientet e Aeroportit Ndërkombëtar të Vlorës.
Ky vendim është marrë duke marrë në konsideratë dëmin e shkaktuar ndaj shoqërisë VIA, si dhe daljet publike mediatike, të cilat kanë cenuar interesat dhe imazhin institucional të shoqërisë.
Me respekt,
Vegim Hoxha
Administrator Vlora International Airport
“`