“`html
Pakti Rama-Vuçiç: Gazetari gjerman shpreh skepticizëm për rrugët e shkurtra
Gazetari i njohur gjerman, Michael Martens, u shpreh në një intervistë për SYRI TV se propozimi i përbashkët i Edi Ramës dhe Aleksandër Vuçiç për anëtarësim “të dorës së dytë” në Bashkimin Evropian, duke kërkuar pjesëmarrje në tregun e përbashkët evropian dhe zonën Shengen, nuk do të jetë i suksesshëm.
Martens theksoi se klima politike aktuale nuk favorizon zgjerimin e BE-së, pasi vende si Gjermania dhe Franca nuk janë gati për këtë hap. Ai sqaroi se anëtarësimi i plotë në BE nuk është aktualisht në diskutim, ashtu siç edhe Serbia dhe Shqipëria nuk plotësojnë kushtet për tregun e vetëm evropian.
“Disa persona mendojnë se tani kërkojnë rrugë të shkurtra për të arritur tek fondet europiane, por nuk do të funksionojë. Nuk mund të bëhesh pjesë e Shengenit, as tregut të vetëm pa përmbushur kushtet kryesore si pavarësia e sistemit të drejtësisë dhe liria e medias. Rruga drejt tregut të vetëm nuk është aq e lehtë,” tha Martens.
Ai shtoi se rruga drejt BE-së është “e mbyllur” për momentin, pasi mungon një shumicë politike e gatshme të pranojë vende të reja që mund të kenë të drejtën e vetos. Martens sugjeroi se vetëm Mali i Zi mund të përgatitet për tregun evropian në 2-3 vitet e ardhshme, por aktualisht synon anëtarësim të plotë, duke shtuar se në Berlin ka persona me ndikim që e mbështesin këtë ide.
Martens theksoi sërish se arritja drejt zonës Shengen apo tregut të përbashkët kërkon plotësimin e kritereve të sundimit të ligjit dhe pavarësisë së drejtësisë. Ai sqaroi se ideja e anëtarësimit “të dorës së dytë” nuk është e re, por është shprehur haptas nga Rama dhe Vuçiç, duke qenë një propozim që daton rreth 10 vite më parë.
Lidhur me pyetjen nëse kjo do të nënkuptojë heqjen dorë nga pengesat e Serbisë ndaj Kosovës, Martens u shpreh se “anëtarësimi i plotë i Serbisë në BE është i pamundur nëse nuk e njeh Kosovën.” Për sa i përket tregut të përbashkët, ai tha se nuk e di nëse Serbia do të bëhet pjesë pa njohur Kosovën si shtet i pavarur, pasi ky debat është ende në fillimet e tij.
“`