Refuzohet projektrezoluta për kufizimin e fuqive të Trump në luftën kundër Iranit
Një projektrezolutë për të kufizuar fuqitë e Presidentit Donald Trump në luftën kundër Iranit është rrëzuar në Senatin e SHBA-së. Shumica republikane mbështeti operacionet ushtarake amerikane dhe izraelite kundër Republikës Islamike të Iranit.
Projektligji, i prezantuar nga senatori demokrat Tim Kaine, nuk arriti të sigurojë shumicën e nevojshme, duke u rrëzuar me 53 vota kundër dhe 47 vota pro. Tim Kaine kishte propozuar rezolutën për të garantuar që forcat e armatosura amerikane të mos përfshiheshin në armiqësi kundër Iranit pa miratimin e Kongresit.
Iniciativa u kundërshtua fuqishëm nga republikanët. Senatorët John Fetterman votuan kundër saj, ndërsa Rand Paul ishte i vetmi anëtar republikan që votoi pro.
Që nga kthimi i tij në Shtëpinë e Bardhë, Donald Trump ka shprehur synimin për të forcuar kompetencat ekzekutive dhe për të marrë një rol më aktiv në kryerjen e operacioneve ushtarake. Tim Kaine, së bashku me senatorë të tjerë demokratë, kërkonin të riafirmojnë se Kongresi është institucioni i vetëm me të drejtën për të shpallur luftë, sipas Kushtetutës së SHBA-së.
Gjatë një informimi të klasifikuar, Kaine shprehu zhgënjimin e tij për faktin se administrata nuk kishte paraqitur prova për një “kërcënim të menjëhershëm” nga Irani ndaj Shteteve të Bashkuara. Ai theksoi se një “kërcënim i menjëhershëm” është thelbësor për legjitimitetin e një veprimi ushtarak.
Senati nuk ishte i vetmi që shqyrtoi projektligjin. Ai pritet të paraqitet edhe në Dhomën e Përfaqësuesve, ku gjithashtu pritet të dështojë. Kryetari i Dhomës së Përfaqësuesve, Mike Johnson, deklaroi se ideja e heqjes së kompetencave të luftës së presidentit është e rrezikshme dhe shkatërruese për Shtetet e Bashkuara.