Rusia sulmon infrastrukturën hekurudhore në Ukrainë, pesë persona të plagosur
Rusia ka kryer sulme ndaj infrastrukturës hekurudhore në Ukrainë, duke shkaktuar plagosjen e pesë personave.
Një punonjës hekurudhor u plagos gjatë një sulmi me dron në mëngjes në rajonin Mykolaiv. Këtë informacion e dha zëvendëskryeministri Oleksiy Kuleba përmes një postimi në aplikacionin Telegram.
Pak më vonë, një punëtor tjetër dhe dy fëmijë u plagosën kur një raketë ruse goditi një ndërtesë administrative në një stacion hekurudhor në rajonin fqinj të Odesës. Një zyrtar raportoi më vonë katër të plagosur në sulmin me raketa, pa specifikuar identitetin e të katërtit.
Kuleba raportoi gjithashtu për një tentativë sulmi nga një dron rus ndaj një treni që udhëtonte midis qytetit qendror lindor Dnipro dhe Kovel në veriperëndim të Ukrainës. Ai tha se treni u ndalua nga punonjësit hekurudhorë dhe droni goditi disa metra larg lokomotivës.
Mediat ukrainase raportojnë se kompania kombëtare hekurudhore, Ukrzaliznytsia, ka njoftuar se Rusia ka intensifikuar sulmet me dron ndaj infrastrukturës hekurudhore, duke shënjestruar edhe mjetet rrotulluese.
Sipas kompanisë, objektiva të sulmeve janë gjithashtu lokomotivat e trenave, trenat e mallrave, pajisjet e specializuara për riparimin e infrastrukturës, si dhe depot hekurudhore dhe urat.