Arrestohet 22-vjeçari pas vjedhjes në shkollën e Lezhës, procedohen 5 të mitur
Policia e Lezhës ka zbardhur ngjarjen e vjedhjes në shkollën 9-vjeçare “Besëlidhja”, e cila ndodhi katër ditë më parë. Si pasojë e veprimeve hetimore, janë identifikuar 6 autorë, mes tyre pesë të mitur. Një 22-vjeçar është arrestuar si autori kryesor, ndërsa pesë të miturit janë proceduar në gjendje të lirë.
Aksioni policor, i koduar “Pajisjet”, ka zbuluar se autorët kanë hyrë në ambientet e shkollës pas mesnate. Gjatë vjedhjes, ata kanë dëmtuar dyert e godinës arsimore dhe kanë marrë me vete 19 pajisje, përfshirë laptopë, videoprojektorë dhe serverin qendror të kamerave të sigurisë.
Sipas njoftimit të Policisë Lezhë, veprimet e shpejta hetimore kanë bërë të mundur identifikimin dhe kapjen e autorëve, si dhe sqarimin e rrethanave të ngjarjes. Në kuadër të operacionit “Pajisjet”, shtetasi A. B., 22 vjeç, është vënë në pranga. Gjithashtu, janë proceduar penalisht pesë persona të mitur, të moshave 15-17 vjeç, nga të cilët tre janë nxënës të së njëjtës shkollë. Dyshohet se 22-vjeçari ka nxitur të miturit për kryerjen e krimit.
Autorët dyshohet se rreth orës 01:00 të datës 14.03.2026 kanë hyrë në shkollë, duke dëmtuar dyert dhe duke vjedhur 16 laptopë, 2 videoprojektorë dhe serverin qendror të kamerave të sigurisë. Pajisjet e vjedhura janë transportuar me automjetin e 22-vjeçarit dhe janë fshehur në bodrumin e një pallati në ndërtim, si dhe në banesën e tij.
Gjatë operacionit, janë gjetur dhe sekuestruar 16 nga pajisjet e vjedhura, si dhe automjeti tip “Volkswagen” i përdorur për transportin. Materialet e rastit i janë referuar Prokurorisë Lezhë për veprime të mëtejshme.