“`html
Dorëzohen 145,2 mijë Deklarata Vjetore të të Ardhurave Personale (DIVA); Tatimet: Mos i vononi deklarimet, përndryshe do të penalizoheni
Sot është afati i fundit për plotësimin dhe dorëzimin e Deklaratës Vjetore të të Ardhurave Personale (DIVA) nga individët. Sipas të dhënave të publikuara nga administrata tatimore, deri më tani janë plotësuar 145,254 deklarata DIVA nga individët.
Data 31 Marsi është gjithashtu dita e fundit për dorëzimin e deklaratave për bizneset dhe korporatat. Deri tani, për kategorinë e bizneseve janë plotësuar 102,840 deklarata, ndërsa nga korporatat janë plotësuar 28,812 deklarata.
Me qëllim shmangien e penaliteteve, administrata tatimore u ka kujtuar tatimpaguesve detyrimin e plotësimit të tyre. Sipas sqarimeve të dhëna nga administrata tatimore për “Monitor”, institucionet shtetërore nuk parashikojnë shtyrje të afatit ligjor për plotësimin dhe dorëzimin e DIVA. Në rast të kundërt, për deklarim të vonuar, tatimpaguesit penalizohen me gjobë vjetore në masën 3 mijë lekë, sipas parashikimeve ligjore.
Drejtori i Përgjithshëm i Tatimeve, Ilir Binaj, ka deklaruar më herët gjatë një konference për shtyp se numri i përgjithshëm i deklaruesve pritet të arrijë në 180 mijë deri në fund të prillit.
Njoftimi i tatimeve:
“Administrata Tatimore rikujton dhe inkurajon të gjithë tatimpaguesit që të dorëzojnë deklaratat tatimore vjetore për vitin 2025 para afatit të fundit, 31 mars 2026. Kjo do të shmangë vonesa apo vështirësi të mundshme si rrjedhojë e fluksit të lartë në sistem gjatë ditëve të fundit të deklarimit.
Ky detyrim përfshin:
- Personat fizikë që dorëzojnë Deklaratën Vjetore të të Ardhurave nga Biznesi (TAPB);
- Personat juridikë që dorëzojnë Deklaratën Vjetore të të Ardhurave të Korporatës (TAK);
- Individët që dorëzojnë Deklaratën Vjetore të të Ardhurave Personale (DVAP – DIVA).
Tatimpaguesit duhet të kenë parasysh se këtë vit, për herë të parë, afati i deklarimit është unifikuar për të gjitha deklaratat tatimore vjetore në datën 31 mars 2026.
Deklarimi i hershëm është i rëndësishëm sepse:
- Shmang mbingarkesën e sistemit në ditët e fundit, kur ka fluks të lartë përdoruesish;
- Shmang penalitetet për mosdeklarim apo deklarim të vonuar, si dhe siguron pagesën në afat të detyrimeve, kur lind një i tillë;
- Garanton përmbushjen e detyrimeve ligjore sipas legjislacionit tatimor në fuqi.
Për çdo informacion apo asistencë, mund të kontaktoni Qendrën e Thirrjeve në numrin pa pagesë 0800 0002.
Administrata Tatimore vlerëson bashkëpunimin dhe angazhimin tuaj për përmbushjen në kohë të detyrimeve tatimore, për të shmangur penalitetet që rrjedhin nga mosdeklarimi apo deklarimi i vonuar.”
“`