Tensionet në Lindjen e Mesme, Macron: Armëpushimi duhet të përfshijë edhe Libanin për të qenë i qëndrueshëm
Presidenti francez Emmanuel Macron e ka cilësuar armëpushimin e fundit si “zgjidhjen më të mirë të mundshme”, duke theksuar se ai duhet të zgjerohet edhe në Liban për të qenë realisht i qëndrueshëm.
Në deklaratat e tij, Macron u shpreh se marrëveshja duhet të respektohet plotësisht “në të gjitha frontet”, duke nënvizuar se përfshirja e Libanit është një kusht kyç për besueshmërinë e saj në planin afatgjatë.
Ai shtoi se çdo marrëveshje gjithëpërfshirëse duhet të adresojë jo vetëm programet bërthamore dhe balistike të Iranit, por edhe rolin dhe politikat e tij në rajon.
Në të njëjtën kohë, kreu i shtetit francez u ndal edhe te çështja e sigurisë së lundrimit në Ngushticën e Hormuzit, duke theksuar se çdo veprim që pengon kalimin e lirë duhet të trajtohet me seriozitet.
Macron ka qenë prej kohësh kritik ndaj ndërhyrjeve ushtarake kundër Iranit, duke i cilësuar më herët si “jorealiste” propozimet për një operacion të përbashkët ushtarak që synon hapjen e kësaj rruge strategjike detare.