VIDEO tronditëse: Sulm në një gjimnaz në Turqi, 18-vjeçari qëllon drejt nxënësve dhe mësuesve
Një ish-nxënës ka hapur zjarr në një shkollë të mesme profesionale në qytetin Siverek, Turqi juglindore, duke plagosur më shumë se dhjetë persona para se të kryente vetëvrasje. Ngjarja, sipas guvernatorit lokal, shkaktoi plagosjen e të paktën 16 personave të martën, njoftoi policia.
Të plagosurit përfshijnë:
- Dymbëdhjetë nxënës
- Katër mësues
- Një polic
- Një punonjës i mensës
Pamjet filmike nga Siverek, në provincën Sanliurfa, treguan nxënës që largoheshin me panik nga shkolla gjatë zhvillimit të incidentit. Sipas guvernatorit të provincës Sanliurfa, Hasan Sildak, agresori 18-vjeçar, i armatosur me një pushkë gjahu, qëlloi drejt njerëzve në oborrin e shkollës. Më pas, i riu hyri në ndërtesë, ku më vonë i mori jetën vetes me të njëjtën armë.
Raportime mediatike sugjerojnë se personi i armatosur mund të ketë marrë peng edhe disa nxënës. Dyshohet se ai ka kryer vetëvrasje pasi refuzoi të dorëzohej përpara forcave speciale, të cilat kishin rrethuar shkollën.
Transmetuesi NTV raportoi se një nga mësuesit e plagosur ndodhet në gjendje të rëndë. Motivet e sulmuesit po hetohen nga policia.