“`html
Bordi rrit sërish çmimin e naftës, arrin në 215 lekë/litër
Bordi i Transparencës, në mbledhjen e tij të datës 14 Prill 2026, ka vendosur të rrisë sërish çmimet e naftës me 6 lekë për litër.
- Çmimi maksimal i shitjes me pakicë për gazoilin e standardit SSH EN 590 do të jetë 215 lekë/litër, ndërsa çmimi maksimal i shitjes me shumicë do të jetë 203 lekë/litër.
- Çmimi maksimal i shitjes me pakicë për benzinën e standardit SSH EN do të jetë 178 lekë/litër, ndërsa çmimi maksimal i shitjes me shumicë do të jetë 166 lekë/litër.
Çmimet e vendosura nga Bordi do të hyjnë në fuqi sot, datë 14, në orën 15:00 dhe do të jenë të vlefshme deri në mbledhjen e ardhshme të bordit, ku do të pasqyrohen ndryshimet e çmimeve të shitjes.
Në rast të shkeljeve të konstatuara nga operatorë të ndryshëm, do të vendoset pezullimi i aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar për të mbrojtur interesat e konsumatorëve shqiptarë dhe për të ruajtur parimet e konkurrencës së ndershme në treg.
SQARIM:
Referuar Aktit Normativ nr. 1, datë 03.04.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, parashikohet se në rast se çmimi i shitjes me pakicë për gazoilin është më i lartë se 220 lekë/litri, ose për benzinën është më i lartë se 200 lekë/litri, zbatohet niveli 80% i akcizës.
Bazuar në zbatimin e metodologjisë për llogaritjen e çmimeve tavan të shitjes me pakicë, çmimet aktuale janë nën kufirin e parashikuar nga Akti Normativ nr. 1, datë 03.04.2026. Për rrjedhojë, niveli i akcizës do të zbatohet i plotë, 100%.
“`