Kryeministri i ri i Hungarisë, Peter Magyar, ka paralajmëruar se Hungaria nuk do të jetë strehë për kriminelët ndërkombëtarë dhe se kërkesat për ekstradimin e Nikolla Gruevskit, ish-kryeministrit të Maqedonisë së Veriut, mund të marrin një përgjigje pozitive.
Magyar, i cili udhëhoqi partinë Tisza drejt fitores kundër Viktor Orbanit në zgjedhjet e 12 prillit, tha në një konferencë për shtyp se “në Hungari nuk duhet të blejnë mobilie nga IKEA, sepse nuk do të qëndrojnë gjatë”, duke përfshirë këtu edhe Gruevskin, të cilin e cilësoi si “shkelës i ligjit”.
Ai shtoi se Hungaria pret nga vendet e tjera evropiane që t’i ekstradojnë kriminelët hungarezë nëse ata arratisen në territorin e tyre, duke theksuar frymën e bashkëpunimit evropian.
Nikolla Gruevski u arratis nga Maqedonia e Veriut në vitin 2018, pak para se të fillonte vuajtjen e dënimit dyvjeçar për rastin “Tenk”. Ai mori azil politik në Hungari, ku autoritetet e atëhershme hungareze arsyetuan vendimin me “ndjekje të mundshme politike dhe gjendje të keqe në burgjet maqedonase”. Kërkesa e Maqedonisë së Veriut për ekstradimin e tij u refuzua nga një gjykatë hungareze në vitin 2019, pasi nuk ishin përmbushur kushtet.
Megjithatë, me ndryshimin e pushtetit në Hungari, pritet një qasje e re ndaj këtij rasti. Kryeministri aktual i Maqedonisë së Veriut, Hristijan Mickoski, ka deklaruar se nëse Gruevski hyn në vend, ai do të arrestohet menjëherë për të vuajtur dënimin.
Lideri i opozitës maqedonase, Venko Filipçe, ka përshëndetur ndryshimin në Hungari, duke theksuar se “nuk do të ketë më fshehje të Gruevskit në Budapest, as marrëveshje biznesi”.
Partia Tisza ka deklaruar se qeveria e re hungareze do t’i japë përparësi rikthimit të sundimit të ligjit, luftës kundër korrupsionit dhe një funksionimi më transparent të shtetit.
Nikolla Gruevski ishte kryeministër i Maqedonisë së Veriut nga viti 2006 deri në 2016. Gjatë periudhës së tij në pushtet, ai kishte marrëdhënie të ngushta me Viktor Orbanin. Përveç dënimit për rastin “Tenk”, Gruevski është dënuar edhe në mungesë për dhunë ndaj kundërshtarëve politikë dhe për rastin “Parcelat në Vodno” për pastrim parash dhe fshehje pasurie. Ai është gjithashtu në listën e sanksioneve të Departamentit të Thesarit të SHBA-së për korrupsion.