Shqipëria e angazhuar për avancimin e praktikave doganore sipas modeleve europiane
Në kuadër të pjesëmarrjes në Takimin Vjetor të Drejtuesve të Doganave të rajonit të Evropës, që po zhvillohet në Bruksel, Drejtori i Përgjithshëm i Doganave, z. Besmir Beja, zhvilloi një takim të veçantë me Sekretarin e Përgjithshëm të Organizatës Botërore të Doganave, z. Ian Saunders.
Gjatë këtij takimi, u diskutua mbi forcimin e bashkëpunimit ndërmjet Administratës Doganore Shqiptare dhe Organizatës Botërore të Doganave. Fokusi kryesor ishte mbështetja për proceset modernizuese, zhvillimin e kapaciteteve institucionale dhe përshpejtimin e digjitalizimit të shërbimeve doganore.
Drejtori i Përgjithshëm i Doganave, z. Beja, vlerësoi rolin kyç të Organizatës Botërore të Doganave në orientimin e reformave dhe promovimin e standardeve ndërkombëtare. Ai theksoi angazhimin e Shqipërisë për të avancuar më tej praktikat doganore, duke u përshtatur me modelet më të mira europiane dhe globale.
Në prezantimin e vizionit për doganat shqiptare, drejtori Beja theksoi prioritetet drejt plotësimit të kritereve për anëtarësim në Bashkimin Evropian. Këto prioritete, në fushën e doganave, përqendrohen në:
- Përafrimin e plotë të legjislacionit.
- Zbatimin e 24 sistemeve të reja të teknologjisë së informacionit.
- Përfshirjen e Inteligjencës Artificiale në analizën e riskut.
- Rritjen dhe forcimin e burimeve njerëzore për të përballuar sfidat e procesit të integrimit.
Nga ana e tij, Sekretari i Përgjithshëm Saunders shprehu gatishmërinë për të vijuar mbështetjen ndaj Administratës Doganore Shqiptare, veçanërisht në drejtim të lehtësimit të tregtisë dhe rritjes së efikasitetit operacional.