“`html
SPAK zhvillon operacion të përbashkët me autoritetet franceze kundër mashtrimeve kompjuterike
Prokuroria e Posaçme Antikorrupsion (SPAK), në bashkëpunim me autoritetet franceze, ka zhvilluar një operacion kundër veprimtarisë së call center-ave të përfshira në mashtrime, duke arrestuar një shtetas shqiptar si pjesë e kësaj skeme.
Sipas njoftimit të SPAK, më datë 22 prill 2026, në bashkëpunim me autoritetet franceze, u ushtruan kontrolle në një qendër thirrjesh dhe në katër banesa në Tiranë. Pas shkëmbimit të informacioneve përmes Eurojust, autoritetet franceze referuan të dhëna lidhur me mashtrimin e disa qytetarëve francezë përmes investimeve të rreme në kriptomonedha.
Dëmi i dokumentuar për katër shtetas francezë arrin në 845,400 euro, ndërsa për nëntë persona të tjerë të identifikuar, dëmi shkon rreth 1.1 milionë euro, për periudhën shkurt–maj 2023.
Skema e mashtrimit realizohej përmes platformës “UNIVERSAL TRADE”. Qytetarët kontaktoheshin nga persona me identitete të rreme franceze dhe orientoheshin të investonin në kriptomonedha.
Njoftimi i SPAK detajon se:
- Struktura e Posaçme kundër Korrupsionit dhe Krimit të Organizuar (SPAK), në bashkëpunim me oficerët e Policisë Gjyqësore të Divizionit Financiar dhe Dixhital të Kërkimeve të Xhandarmërisë së Pau (Francë), zhvilluan më 22.4.2026, kontrolle në një qendër thirrjesh dhe katër banesa në Tiranë. Këto kontrolle lidheshin me një hetim të përbashkët për veprën penale të “Mashtrimit Kompjuterik”.
- Nga shkëmbimi spontan i informacionit, i dërguar nga Eurojust, seksioni i kërkimeve të xhandarmërisë në Pau i ka përcjellë Prokurorisë së Posaçme të dhënat mbi hetimin për mashtrimin e disa qytetarëve francezë për investime në kriptomonedha.
- Mbi bazën e këtij informacioni, është regjistruar procedimi penal nr. 39/20255 për veprat penale “Mashtrim kompjuterik”, i kryer në bashkëpunim në formën e grupit të strukturuar kriminal, “Grup i strukturuar kriminal”, si dhe “Kryerje e veprave nga organizata kriminale dhe grupi i strukturuar kriminal”, të parashikuara nga nenet 28/4, 143/b, 333/a dhe 334 të Kodit Penal.
- Prokuroria e Pau po zhvillon hetime paraprake për mashtrim përmes investimeve në kriptomonedha, të kryera në kuadër të një grupi të organizuar, përmes shoqërisë “UNIVERSAL TRADE” (https://universaltrade.io), si dhe për pastrim parash në rrethana rënduese, pas disa kallëzimeve të paraqitura nga katër shtetas francezë.
- Dëmi i shkaktuar katër shtetasve francezë është në vlerën e 845,400 euro, ndërsa ndaj 9 kallëzuesve të tjerë, tashmë të identifikuar, dëmi ka arritur shifrën e 1.1 milionë eurove për periudhën shkurt 2023 – maj 2023.
- Viktimat kontaktoheshin nga agjentë me identitete të rreme franceze, të cilët i udhëzonin shtetasit francezë të investonin në kriptomonedha, përmes platformës https://universaltrade.io.
- Hetimi i përbashkët ka mundësuar gjurmimin e fondeve të transferuara në kriptovaluta nga viktimat, duke çuar në identifikimin e mbajtësve të portofoleve, mes të cilëve edhe disa shtetas shqiptarë. Këta shtetas dyshohet se kanë hapur portofole kriptovalutash me qëllim transferimin e fondeve drejt autorëve të mashtrimit.
- Shtetasit e identifikuar janë: A. B., E. Sh., B. Z., F. B., G.P. Pas kontrolleve dhe marrjes në pyetje të shtetasve A. B., E. Sh. dhe B.Z., rezulton se shtetasi G.P. ka qenë personi kryesor i përfshirë në hapjen e portofoleve të kriptovalutave dhe transferimin e fondeve të viktimave.
- Në këto kushte, urdhri i ndalimit i lëshuar nga prokurori i posaçëm është ekzekutuar nga hetuesit e Byrosë Kombëtare të Hetimit.
Si rezultat i këtij operacioni ndërkombëtar dhe kontrolleve të ushtruara, janë sekuestruar:
- Njësi kompjuterike, pajisje elektronike memorizuese, telefona celularë, katër portofole “cold wallet”.
- Një automjet luksoz, dokumente të ndryshme të lidhura me viktimat dhe personat e përfshirë.
- Vula të subjekteve ekonomike, dokumente identifikimi të dyshuara si të falsifikuara, pajisje për numërimin automatik të parave.
- Shuma monetare në dollarë amerikanë, dollarë kanadezë, euro, paund dhe lekë, me një vlerë totale rreth 5,000,000 lekë.
Vazhdon analiza e hollësishme e të dhënave hetimore me qëllim dokumentimin e plotë të përgjegjësisë penale të personave dhe subjekteve të përfshira në këtë veprimtari kriminale.
Kontrollet e kryera më 22.4.2026 u zhvilluan në bashkëpunim të ngushtë me Agjencinë e Mbikëqyrjes Policore dhe mbështetjen e Policisë së Shtetit.
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
“`