Turqia miraton ligjin për kufizimin e mediave sociale për personat nën 15 vjeç
Parlamenti turk miratoi të mërkurën në mbrëmje një ligj që ndalon aksesin në mediat sociale për personat nën moshën 15 vjeç. Sipas ligjit, personat nën 15 vjeç do të pengohen të regjistrohen në platformat e mediave sociale, ndërsa platformat dixhitale do të obligohen të zbatojnë sisteme të verifikimit të moshës.
Sipas raporteve të mediave të huaja, prindërve do t’u ofrohen mjete për të monitoruar kohën që fëmijët e tyre kalojnë para ekranit dhe shpenzimet online. Gjithashtu, në rast urgjence, platformat kryesore të mediave sociale do të duhet të reagojnë brenda një ore nga shpërndarja e përmbajtjes së dëmshme.
Ky ligj do të hyjë në fuqi gjashtë muaj pas publikimit të tij në Gazetën Zyrtare.
Disa vende po shqyrtojnë mundësinë e ndalimit të aksesit në mediat sociale për personat nën 15 vjeç. Javën e kaluar, Presidentja e Komisionit Evropian, Ursula von der Leyen, dhe udhëheqësit e 12 vendeve të BE-së (Austria, Qipro, Republika Çeke, Gjermania, Greqia, Irlanda, Italia, Holanda, Polonia, Portugalia, Sllovenia dhe Spanja) diskutuan një kufizim të ngjashëm për aksesin e fëmijëve në mediat sociale. Ky numër përfaqëson dyfishin e vendeve që fillimisht ofruan vullnetarisht këtë masë vjeshtën e kaluar, duke treguar se masa po “fiton terren”, siç theksoi presidenti francez.