Drejtuesit e doganave Shqipëri e Kosovë diskutojnë për lehtësimin e tregtisë dhe procedurave
Drejtori i Përgjithshëm i Doganave, z. Besmir Beja, zhvilloi një takim zyrtar me Drejtorin e Përgjithshëm të Doganave të Kosovës, Agron Llugaliu. Ky takim synon forcimin e bashkëpunimit ndërinstitucional mes dy administratave doganore.
Takimi dypalësh, i zhvilluar në ambientet e Administratës Doganore të Kosovës, mblodhi drejtuesit kryesorë të të dy institucioneve. Ata rikonfirmuan marrëdhëniet shumë të mira dhe bashkëpunimin e konsoliduar ndër vite. U theksua nevoja për të avancuar këtë bashkëpunim përmes veprimeve dhe iniciativave të përbashkëta.
Gjatë diskutimeve u evidentua rëndësia e lehtësimit të mëtejshëm të tregtisë dhe procedurave doganore. U diskutua veçanërisht roli i zyrave të Doganës së Kosovës në Portin e Durrësit dhe Porto Romano. Këto zyra kanë kontribuar në përshpejtimin e përpunimit të mallrave dhe uljen e kostove për operatorët ekonomikë.
Po ashtu, u theksua rëndësia e:
- Digjitalizimit dhe ndërveprimit të sistemeve, duke përdorur ASYCUDA World dhe shkëmbimin elektronik të të dhënave. Kjo shihet si një element kyç për rritjen e transparencës dhe efikasitetit.
- Forcimit të bashkëpunimit në fushën e menaxhimit të riskut dhe shkëmbimit të informacionit në kohë reale.
- Bashkëpunimit operacional dhe hetimor përmes veprimeve të koordinuara dhe pjesëmarrjes në iniciativa të përbashkëta rajonale.
U vlerësua pozitivisht progresi i arritur në lehtësimin e lëvizjes në pikat kufitare. Kjo është arritur përmes procedurave të harmonizuara dhe funksionimit të pikës së përbashkët “One Stop Shop” në Morinë – Vërmicë. Kjo pikë ka ndikuar në reduktimin e kohës së pritjes dhe rritjen e flukseve tregtare.
“Objektivi ynë është t’i çojmë në një stad edhe më të avancuar marrëdhëniet shumë të mira mes dy Administratave Doganore, përmes veprimeve të koordinuara dhe iniciativave të përbashkëta. Kjo në funksion të lehtësimit të tregtisë së ligjshme, rritjes së sigurisë dhe garantimit të konkurrencës së ndershme për bizneset në të dy vendet,” u shpreh ndër të tjera, Drejtori i Përgjithshëm i Doganave, z. Besmir Beja. Ai theksoi gjithashtu rëndësinë e forcimit të mëtejshëm të bashkëpunimit në fushën e zbatimit të ligjit, analizës së riskut dhe shkëmbimit të informacionit. Këto konsiderohen elementë kyç për një administrim modern dhe efikas doganor.
Palët vlerësuan pozitivisht funksionimin e Komitetit të Përbashkët të Ekspertëve dhe mekanizmave ekzistues të bashkëpunimit. U nënvizua roli i tyre në adresimin e çështjeve teknike dhe përmirësimin e vazhdueshëm të procedurave.