“`html
Berisha: Agresori i Albanës në parlament është Taulant Balla, i akuzuar për porositje vrasjesh
Kryetari i Partisë Demokratike, Sali Berisha, ka deklaruar se Shqipëria po qeveriset në kushte të një “regjimi autokratik”, ku hapësirat e lirisë për qytetarët dhe opozitën janë ndjeshëm të kufizuara.
Gjatë një aktiviteti politik, Berisha akuzoi mazhorancën dhe përfaqësuesit e saj për sulme ndaj opozitës, duke përmendur raste presioni politik dhe tensione në Kuvend. Ai shtoi se situata aktuale për gratë dhe vajzat në vend është e vështirë.
Berisha pretendoi se ndaj opozitës po ushtrohet një fushatë e qëllimshme politike dhe institucionale për ta dobësuar atë, duke theksuar se këto zhvillime përbëjnë rrezik për funksionimin normal të demokracisë në vend.
Ai falënderoi Fondacionin Jarl Hjalmarson dhe presidenten e tij, Eva Gustavson, për mbështetjen e dhënë Partisë Demokratike për 25-30 vite. Gjithashtu, falënderoi kryeministrin suedez, Ulf Kristerson, për drejtimin e suksesshëm të vendit të tij, si dhe përfaqësuesen e rinisë së IDU-së, Eva Doalova, presidentin Harper, sekretaren e përgjithshme Tina, dhe zotin Filip Uthamar nga partia suedeze.
Duke iu drejtuar të pranishmëve, Berisha tha: “Jemi sot në një diktaturë autokratike. Një regjim në të cilin hapësirat e lirisë janë të ngushtuara për qytetarët dhe sidomos për opozitën. Ne jetojmë në një regjim që nga mëngjesi gjer në darkë ka në axhendën e tij luftën aprincipiale dhe të egër kundër opozitës dhe drejtuesve të saj.”
Ai vazhdoi duke theksuar se Albana Vokshi është sulmuar në mënyrë brutale dhe targetuar familjarisht nga “banditët e kësaj qeverie”, duke shtuar se këta “banditë” janë jo vetëm në terren, por edhe në parlament.
“Ai që agresoi Albanën në parlament dhe që quhet Taulant Balla, ai është një porositës vrasjesh me dokumenta zyrtare. Ai person, që sot kryeson grupin e Partisë Socialiste dhe qarkullon si përfaqësues i kësaj pseudo-mazhorance nëpër botë, figuron në dosje gjyqësore se ka porositur vrasje. Kjo dosje gjyqësore është eliminuar me vendim gjykate dhe prokurori për ta mbrojtur atë. Nuk është vetëm një rast, por brenda tij janë disa raste,” deklaroi Berisha.
Ai pyeti publikun nëse ka ndonjë dallim midis personit që sulmoi Albanën dhe vajzën e saj pranë qendrës së votimit dhe kreut të grupit parlamentar të Partisë Socialiste, i cili e sulmoi atë në sallën e parlamentit.
Berisha theksoi kushtet e vështira për gratë dhe vajzat shqiptare dhe akuzoi kryeministrin si “mizogjenin më mizogjen në Europë”, duke përshkruar qëndrimet e tij brutale ndaj ministreve dhe duke i krahasuar me “sekuenca të Idi Aminit në mbledhjet e qeverisë”. Ai e cilësoi kryeministrin si një mizogjen të pamëshirshëm, të padenjë jo vetëm për postin e tij, por për asnjë post tjetër në Shqipëri.
“`