Pushimet shndërrohen në tragjedi! Turist gjerman humb jetën pas kafshimit të gjarprit gjatë një shfaqjeje në hotel
Një turist 57-vjeçar nga Gjermania ka humbur jetën pas një incidenti tragjik gjatë pushimeve në Egjipt, pasi u kafshua nga një gjarpër gjatë një shfaqjeje në një hotel.
Sipas policisë në shtetin gjerman të Bavarisë, ngjarja ka ndodhur në resortin Hurghada, ku burri po ndiqte një performancë me gjarpërinj. Gjatë shfaqjes, u përdorën dy gjarpërinj, të cilët dyshohet se ishin kobra dhe u vendosën mbi pjesëmarrësit e publikut.
Sipas hetimeve, njëri prej gjarpërinjve është lejuar të futet brenda pantallonave të turistit, duke e kafshuar atë në këmbë. Autoritetet thanë se viktima shfaqi shenja të rënda helmimi dhe fillimisht iu dha ndihma në vendngjarje, përpara se të transportohej me urgjencë në spital, ku më vonë ndërroi jetë.
Turisti, emri i të cilit nuk është bërë publik, ishte nga rajoni Unterallgäu në Bavari dhe ndodhej me pushime së bashku me dy familjarë.
Policia gjermane dhe prokuroria kanë hapur hetim për vdekjen dhe po presin rezultatet e analizave toksikologjike. Ndërkohë, autoritetet egjiptiane kanë deklaruar se nuk kanë informacion për incidentin.