“`html
Yield-et e bonove 12-mujore shënuan rritje të lehtë, por shqetësimet inflacioniste në treg mbeten
Yield-et e bonove 12-mujore shënuan një rritje të lehtë në ankandin e kësaj jave. Megjithatë, tregu ende nuk po shfaq ndonjë pritshmëri të mirëfilltë për zhvendosjen në rritje të inflacionit dhe normave të interesit.
Sipas informacionit nga Banka e Shqipërisë, yield-i mesatar i ponderuar u rrit në 2.52%, nga 2.48% që kishte qenë në ankandin e mëparshëm në mesin e muajit prill.
Rritja e yield-it duket të ketë ardhur kryesisht nga një ngushtim i diferencës mes kërkesës dhe ofertës në ankand. Përkundrejt një shume të shpallur për financim prej 7.8 miliardë lekësh, kërkesa totale në ankand ishte afërsisht 8.1 miliardë lekë. Në fund, Ministria e Financave pranoi kërkesa në një shumë lehtësisht më të ulët se ajo e shpallur për financim, me 7.66 miliardë lekë.
Yield-et e bonove 12-mujore janë kthyer pak mbi normën bazë të interesit, por tregu nuk po jep ende sinjale të një tendence të mirëfilltë në rritje.
Konflikti në Lindjen e Mesme ka shtuar shqetësimin për rritjen e inflacionit në ekonominë botërore dhe Shqipëria nuk bën përjashtim. Në mars, inflacioni u rrit lehtë nga 2.5% në 2.6%, pasi shtrenjtimi i karburanteve u balancua nga ulja e inflacionit të ushqimeve.
Në vazhdim, pritshmëritë janë në kahun e një inflacioni në rritje. Megjithatë, në përgjithësi, bankat qendrore dhe tregjet financiare mbeten në pozita pritëse, duke shpresuar në përmirësimin e situatës gjeopolitike që i ka dhënë shtysë rritjes së çmimit të naftës bruto. Asnjëra prej bankave qendrore ende nuk ka ndërhyrë me rritjen e normave të interesit.
Pas mbledhjes së fundit të Këshillit Mbikëqyrës, edhe Banka e Shqipërisë u shpreh se do të marrë kohë për të vlerësuar më qartë efektet që ky konflikt mund të sjellë në ekonominë globale dhe atë shqiptare.
Raporti i politikës monetare për tremujorin e parë të vitit vinte në dukje se konflikti ushtarak në Lindjen e Mesme dhe intensifikimi i tensioneve gjeopolitike rrezikojnë të shndërrohen në një goditje negative oferte për ekonominë shqiptare. Kjo goditje mund të pasqyrohet në rritje të inflacionit dhe frenim të rritjes ekonomike në vend.
Nga ana tjetër, kurba e yield-eve në tregun e brendshëm nuk ka shfaqur ndryshime të mëdha, me përjashtim të një korrektimi të lehtë në rritje, sidomos për titujt më afatgjatë. Tregu i brendshëm vazhdon të karakterizohet nga një situatë e qetë dhe një gjendje e mirë likuiditeti. Normat e ulëta të interesit po favorizojnë edhe një ecuri pozitive të kreditimit të sektorit privat, megjithëse me ritme më të ngadalësuara krahasuar me vitin e kaluar.
“`