“`html
Energjia e anijeve lundruese, e drejtuar nga Belinda Balluku, rezulton 6 herë më e shtrenjtë se tregu. Gazment Bardhi i bën thirrje SPAK-ut.
Kreu i Grupit Parlamentar të Partisë Demokratike, Gazment Bardhi, ka përkujtuar dorëzimin në Prokurorinë e Posaçme, një vit më parë, të dokumentacionit që implikon Belinda Ballukun në aferën me anijet lundruese për prodhim energjie, të njohura si “Tigri 1” dhe “Tigri 3” në Vlorë.
Në një postim në rrjetet sociale, Bardhi i bëri thirrje SPAK-ut të ndjekë paranë, duke e cilësuar këtë si përgjigjen përse energjia e prodhuar nga “Tigrat e Belindës” është deri në 6 herë më e shtrenjtë se çmimi i tregut.
Postimi i plotë:
Më shumë se një vit më parë, kam dorëzuar në SPAK dokumentacion zyrtar që implikon drejtpërdrejt Belinda Ballukun në një nga aferat më të mëdha korruptive: anijet lundruese për prodhimin e energjisë “Tigri 1” dhe “Tigri 3” në Vlorë.
Në dosjen e dërguar në SPAK, kam argumentuar me prova se:
- Vendi nuk ishte në kushtet e emergjencës. Kjo u konfirmua nga vetë Belinda Balluku, kur deklaroi se anijet do të prodhonin energji vetëm 2 vite pas kontratës.
- Kushtet e tenderit u krijuan për të favorizuar fituesin dhe se ai ishte i paracaktuar, me një garë fiktive. Kompania kishte njoftuar autoritetet amerikane për marrjen e tenderit para shpalljes së fituesit.
- Kompania nuk i zotëronte anijet as kur u shpall tenderi, as kur u shpall fituese.
- Kostot ishin shumë të larta dhe 80 milionë euro për dy anijet nuk dihet ku shkojnë, pasi kompania është e regjistruar në një parajsë fiskale.
- Energjia që do të prodhohej ishte shumë e shtrenjtë.
Nuk e di çfarë po bën SPAK me këtë dosje, që vjedh hapur shqiptarët dhe merr çdo ditë nga paratë publike rreth 100 mijë euro.
Një investigim i emisionit “Piranjat” ka sjellë së fundi të dhëna tronditëse: prodhimi i energjisë nga “Tigrat” është deri në 6 herë më i shtrenjtë se tregu. Të dhënat tregojnë se energjia e prodhuar nga anijet lundruese ka një kosto prej 675 €/MWh, ndërsa çmimi i tregut është vetëm 111 €/MWh. Diferenca është e jashtëzakonshme.
Prandaj, SPAK-ut i takon të zbulojë pse u firmos një kontratë e tillë që zhvat miliona euro nga shqiptarët. “Ndiq paranë” është rruga më e mirë për të zbuluar korrupsionin. Kjo është harta e vërtetë që SPAK-u duhet të ndjekë për të shkuar tek burimi i kësaj historie.
Prandaj, thirrja ime për SPAK-un është vetëm një: Ndiq paranë. Aty është përgjigjja përse “Tigrat e Belindës” prodhojnë energji deri në 6 herë më të shtrenjtë se tregu.
“`