“`html
Ministri i Jashtëm Gjerman: Irani duhet të braktisë programin e raketave balistike
Ministri i Jashtëm gjerman, Johann Vandeful, i ka bërë thirrje Iranit të heqë dorë nga programi i tij i raketave balistike, duke theksuar partneritetin e ngushtë të sigurisë mes Gjermanisë dhe Izrealit.
Në një konferencë të përbashkët për shtyp me homologun e tij izraelit, Gideon Saar, në Berlin, Vandeful u shpreh: “Si Gjermania ashtu edhe Izraeli i ndajnë plotësisht këto interesa sigurie dhe po bëhet gjithnjë e më urgjente çdo ditë që Irani të pranojë ofertën për negociata. Ne i bëjmë thirrje Iranit të mos i mbivlerësojë kartat e tij”.
Ministri gjerman theksoi se konfliktet aktuale me Rusinë dhe Iranin, si dhe situata në Ukrainë, kanë treguar se Gjermania dhe Izraeli janë më afër se kurrë dhe ndajnë interesa të përbashkëta. Ai shtoi se mbrojtja e ekzistencës dhe sigurisë së Shtetit të Izraelit është në zemër të marrëdhënieve gjermano-izraelite.
“Duke pasur parasysh situatën globale, të dy vendet tani kanë krijuar një partneritet krejtësisht të ri sigurie, ndërsa ndajnë plotësisht interesat e sigurisë, veçanërisht në lidhje me programin bërthamor të Iranit dhe programin e tij të raketave balistike”, tha Vandeful.
Ai përmendi blerjen e sistemit izraelit të mbrojtjes nga raketat Arrow 3, duke theksuar se teknologjia izraelite mbron hapësirën ajrore gjermane dhe duke shprehur kënaqësi për miqësinë me Izraelin.
Vandeful bëri gjithashtu thirrje për “përmirësim urgjent” të ndihmës humanitare për palestinezët në Gaza dhe përsëriti kundërshtimin e Berlinit ndaj një aneksimi de facto të Bregut Perëndimor.
“Situata e rëndë e më shumë se dy milionë njerëzve në Rripin e Gazës nuk duhet të lihet në hije nga konflikti me Iranin. Ndihma humanitare duhet të përmirësohet urgjentisht, të hapen më shumë kalime kufitare dhe punonjësve humanitarë t’u lejohet të bëjnë punën e tyre”, theksoi ai.
Ministri gjerman përsëriti qëndrimin e Gjermanisë se vetëm një zgjidhje me dy shtete mund t’i japë fund konfliktit izraelito-palestinez. Ai shprehu shqetësim për aktivitetin e vazhdueshëm të Izraelit për ndërtimin e vendbanimeve dhe kundërshtoi aneksimin de facto të pjesëve të Bregut Perëndimor. Ai gjithashtu dënoi dhunën e kryer nga disa kolonë izraelitë kundër popullsisë civile palestineze dhe kërkoi që këto krime të ndëshkohen.
Nga ana e tij, ministri i Jashtëm izraelit, Gideon Saar, dënoi sulmet e Iranit kundër Emirateve të Bashkuara Arabe dhe e përshkroi “vrasjen” e lirisë së lundrimit nga Irani si një “kërcënim për rendin botëror”.
Saar fajësoi Hezbollahun për luftimet në Liban dhe theksoi se Izraeli nuk ka ambicie territoriale në këtë rajon.
Duke iu përgjigjur një pyetjeje, Saar siguroi se të krishterët janë të sigurt në Izrael dhe Paralajmëroi me ashpërsi se kushdo që ngre dorë kundër të krishterëve do të trajtohet rëndë.
“`