“`html
Yield-i i bonove 12-mujore arrin nivelin më të lartë në shtatë muaj
Yield-et e bonove 12-mujore kanë shënuar një rritje të lehtë në ankandin e kësaj jave, duke arritur nivelin më të lartë që prej shtatorit të vitit të kaluar.
Sipas informacionit nga Banka e Shqipërisë, yield-i mesatar i ponderuar arriti në 2.57%, nga 2.52% që kishte qenë në ankandin e mëparshëm. Megjithatë, rritja e yield-it u ndikua edhe nga rritja e shumës së emetimit nga Ministria e Financave.
Nga 9 miliardë lekë që kishte qenë shuma e shpallur për financim, në ankand u paraqitën kërkesa totale në vlerën e 11.06 miliardë lekëve. Ministria e Financave vendosi ta rrisë shumën e emetimit në 10.24 miliardë lekë, çka ndikoi në një yield mesatar më të lartë.
Që prej muajit mars, tregjet financiare ndodhen në një situatë pritjeje, pasi konflikti që përfshiu SHBA, Izraelin dhe Iranin solli një rritje të çmimeve të naftës. Shtrenjtimi i produkteve energjetike ka sjellë një rritje të menjëhershme të presioneve dhe pritshmërive inflacioniste.
Për momentin, rritja e inflacionit ka ardhur vetëm nëpërmjet kanalit direkt të transmetimit në nënproduktet e naftës bruto. Këtë muaj, inflacioni në Shqipëri u rrit në nivelin 2.8%, duke ngelur ende poshtë objektivit të Bankës së Shqipërisë.
Megjithatë, konflikti i ngelur pezull vazhdon të kushtëzojë çmime më të larta të naftës, që gradualisht do të përcillen në kostot e prodhimit dhe me shumë mundësi do të sjellin një rritje të mëtejshme të inflacionit në muajt e ardhshëm.
Rritja e inflacionit pritet të sjellë edhe reagimin e Bankave Qendrore, të cilat për momentin kanë preferuar të presin zhvillimet gjeopolitike, me shpresën e një zgjidhjeje të konfliktit. Por, ndërkohë që inflacioni po rritet, një kthim i normave të interesit në kahun rritës është gjithnjë e më i mundshëm.
Këshilli Mbikëqyrës i Bankës së Shqipërisë shprehej pas mbledhjes së këtij muaji se konflikti ushtarak dhe tensionet gjeopolitike në Lindjen e Mesme mbeten një burim rreziku dhe pasigurie mbi ekonominë botërore dhe atë shqiptare. Ndikimi i tij në ekonomi dhe në inflacion do të varet dukshëm nga kohëzgjatja dhe intensiteti i konfliktit, duke e zhvendosur balancën e rreziqeve në kahun e sipërm për inflacionin dhe në kahun e poshtëm për rritjen ekonomike në afatin e mesëm.
Deri tani, tregu i brendshëm financiar ka reaguar me një rritje të lehtë të yield-eve të titujve qeveritarë, kryesisht për instrumentet afatgjata, por lëvizjet nuk tregojnë pritshmëri për rritje shumë të madhe të normave të interesit.
Sidoqoftë, duket se cikli i fundit rënës i yield-eve, që në Shqipëri ka vijuar për afërsisht dy vjet, është frenuar, siç tregoi ankandi i bonove 12-mujore. Tashmë, tregjet presin lëvizjet e bankave qendrore për më shumë qartësi, por, nëse tensionet gjeopolitike vijojnë, duket se yield-et do të jenë drejt një cikli të ri në rritje.
Burimi: BSH
“`