Udhëzimi i ri në shëndetësi, QSUT do të ofrojë për herë të parë trajtim hormonal për transgjinorët
Ministria e Shëndetësisë ka miratuar një udhëzim të ri që mundëson për herë të parë ofrimin e terapisë hormonale për personat transgjinorë brenda sistemit publik shëndetësor shqiptar.
Ky shërbim do të jetë i disponueshëm në Qendrën Spitalore Universitare “Nënë Tereza” në Tiranë dhe do të mbulohet nga fondet publike. Udhëzimi përcakton rregullat mjekësore dhe procedurat që duhet të ndiqen për çdo rast, si dhe mënyrën e monitorimit të pacientëve gjatë trajtimit. Synimi kryesor është sigurimi i një terapie të kryer nën mbikëqyrje të plotë mjekësore, duke eliminuar praktikat joformale të mëparshme.
Trajtimi parashikohet si për të rriturit, ashtu edhe për adoleshentët nga mosha 16 vjeç, me kusht vlerësimin nga mjekë specialistë dhe pëlqimin e familjes. Në raste të veçanta dhe pas një vlerësimi të detajuar, terapia mund të merret në konsideratë edhe për moshat mbi 14 vjeç.
Dokumenti thekson se vendimi për fillimin e terapisë nuk është i thjeshtë dhe kërkon një vlerësim të kujdesshëm të gjendjes psikologjike dhe emocionale të personit, si dhe aftësinë e tij për të kuptuar efektet e mundshme të trajtimit, përfshirë ato afatgjata.
Terapia hormonale do të aplikohet sipas rastit: testosteron për personat transgjinorë nga femër në mashkull dhe estrogjen e anti-androgjenë për ata nga mashkull në femër.
Deri më tani, shumë persona transgjinorë në Shqipëri janë detyruar të kërkojnë trajtim jashtë vendit ose të përdorin mënyra jozyrtare brenda vendit, duke sjellë kosto të larta dhe mungesë të kontrollit mjekësor.