Dron rus bie në Rumani gjatë sulmeve ndaj Ukrainës, plagosen dy persona
Një dron rus, i cili u përdor gjatë sulmeve ajrore ndaj Ukrainës, u rrëzua mbi një bllok apartamentesh në lindje të Rumanisë, duke shkaktuar lëndimin e dy personave dhe një zjarr. Incidenti u njoftua nga autoritetet rumune.
Sipas Ministrisë së Mbrojtjes së Rumanisë, droni u zbulua nga radarët pasi hyri në hapësirën ajrore rumune dhe më pas u përplas në çatinë e një pallati në qytetin Galați. Pas përplasjes shpërtheu një zjarr, ndërsa dy persona pësuan lëndime të lehta dhe morën ndihmë mjekësore. Disa banorë të tjerë u evakuuan nga godina.
Menjëherë pas ngjarjes, forcat e emergjencës reaguan në vendngjarje, ndërsa ushtria rumune dërgoi në ajër dy avionë luftarakë F-16 dhe një helikopter të pajisur për ndjekjen e objektivave ajrore. Banorëve të zonës iu dërguan mesazhe alarmi për situatën e rrezikshme.
Ministria e Jashtme e Rumanisë e cilësoi incidentin si një “përshkallëzim të rëndë dhe të papërgjegjshëm” nga ana e Rusisë dhe një “shkelje serioze të së drejtës ndërkombëtare” dhe të hapësirës ajrore rumune. Bukureshti deklaroi se do të ndërmarrë hapa diplomatikë si kundërpërgjigje ndaj incidentit dhe i kërkoi NATO-s të përshpejtojë transferimin e sistemeve dhe mjeteve kundër dronëve në Rumani.
Një zëdhënës i NATO-s dënoi “pakujdesinë e Rusisë” dhe theksoi se aleanca do të forcojë mbrojtjen kundër kërcënimeve ajrore, duke përfshirë sulmet me dronë.
Ngjarja ndodhi në qytetin Galați, pranë lumit Danub dhe afër kufirit me Moldavinë dhe Ukrainën, në një periudhë kur sulmet ruse ndaj infrastrukturës dhe qyteteve ukrainase janë intensifikuar.
Sekretari i Përgjithshëm i OKB-së, António Guterres, paralajmëroi në Këshillin e Sigurimit se numri i civilëve të vrarë në luftën Rusi-Ukrainë gjatë katër muajve të parë të këtij viti ka qenë më i lartë se në të njëjtën periudhë të tre viteve të mëparshëm. Ai bëri thirrje për një ulje të menjëhershme të tensioneve dhe një armëpushim të plotë e të pakushtëzuar, duke paralajmëruar për pasoja të paparashikueshme nga përshkallëzimi i konfliktit.
Ndërkohë, presidenti ukrainas Volodymyr Zelenskyy deklaroi se po kërkon nga SHBA-ja më shumë sisteme mbrojtëse Patriot për të përballuar sulmet ruse me raketa balistike dhe dronë.
Përfaqësuesja e Lartë e Bashkimit Europian për Politikën e Jashtme dhe Sigurinë, Kaja Kallas, paralajmëroi të premten se Rusia nuk duhet të lejohet të shkelë hapësirën ajrore europiane “pa pasoja”.
“Rusia ka kohë që nuk respekton më kufijtë. Moska nuk mund të lejohet të cenojë hapësirën ajrore europiane pa u ndëshkuar”, deklaroi Kallas në një postim në rrjetin social X. Ajo shtoi se ministrat e Jashtëm të Bashkimit Europian janë zotuar të rrisin presionin ndaj Rusisë, të shtojnë mbështetjen për Ukrainën dhe të investojnë më shumë në gatishmërinë mbrojtëse të Europës.
Deklaratat e saj vijnë pas incidentit kur një dron rus goditi një ndërtesë banimi në qytetin Galați të Rumanisë, gjatë një sulmi ndaj infrastrukturës ukrainase pranë kufirit rumun. Ky incident ka ngritur shqetësime të reja për sigurinë në rajon dhe rrezikun e përshkallëzimit të konfliktit përtej territorit ukrainas.