“`html
Pas incidentit të dhunshëm në Zvërnec, hiqet teli me gjemba dhe licensa e dy kompanive të rojeve private. Ndërkohë, zhvillohet sërish protestë në Tiranë, ndërsa Kryeministri Rama pritet të flasë sot për vetë projektin dhe të vërtetat rreth tij.
Policia e Shtetit ka njoftuar se u ka hequr licencën dy subjekteve të Shërbimit Privat të Sigurisë Fizike (ShPSF) – “Myrto Security 1.3A” dhe “Major Security” – pas dhunës së ushtruar ndaj banorëve gjatë protestës në Zvërnec.
Policia ka deklaruar se vijojnë intensivisht hetimet administrative nga Drejtoria e Standardeve Profesionale dhe Departamenti për Sigurinë Publike pranë Drejtorisë së Përgjithshme të Policisë së Shtetit. Këto hetime kanë për qëllim zbardhjen e plotë të përgjegjësive lidhur me veprimet dhe mosveprimet gjatë tubimit të zhvilluar më 30.05.2026 në Portonovë, Zvërnec. Gjithashtu, po shqyrtohet ligjshmëria e subjekteve private të sigurisë fizike të kontraktuara nga pronari për ruajtjen e pronës në Portonovë.
Sipas njoftimit, subjekti “Myrto Security 1.3A” nuk kishte marrë masat e duhura për sigurinë e objektit dhe nuk kishte zbatuar rregullat për hyrjen dhe daljen e personave dhe mjeteve. Mungonte lista e personave dhe mjeteve të lejuara të hynin. Për pasojë, më 30.05.2026, persona të paidentifikuar dhe të panjohur nga personeli i shërbimit kanë hyrë në zonën e rrethuar. Gjatë tubimit, këta persona kanë ndërhyrë pa asnjë atribut ligjor, kanë goditur dhe tërhequr me forcë një pjesëmarrës në protestë, duke i shkaktuar lëndime trupore. Gjithashtu, ata kanë reaguar kundër protestuesve me gurë dhe sende të tjera nga brendësia e rrethimit. Punonjësit e “Myrto Security 1.3A” nuk kanë ndërmarrë asnjë veprim parandalues apo për largimin e personave dhunues.
Ndërkohë, një punonjës i licencuar i “Major Security”, së bashku me dy persona të tjerë të proceduar penalizisht (të cilët rezultuan të pa regjistruar apo licencuar nga subjekti), kanë kryer veprime arbitrare, duke shpërdoruar detyrën dhe tejkaluar kompetencat. Ata kanë goditur me grusht një protestues, e kanë marrë me forcë dhe e kanë dërguar në brendësi të rrethimit, duke i shkaktuar dëmtime trupore.
Në përfundim të hetimeve administrative për shkeljet e konstatuara, Drejtori i Përgjithshëm i Policisë së Shtetit ka vendosur heqjen e licencës për ushtrimin e aktivitetit për të dy subjektet, “Myrto Security 1.3A” dhe “Major Security”, bazuar në ligjin “Për shërbimin privat të sigurisë fizike”. Hetimet penale dhe administrative vijojnë.
Hiqet teli me gjemba
Teli me gjemba, i cili ishte bashkëngjitur me telin rrethues në kantierin ku po zhvillohen punime në Zvërnec, është hequr këtë të diel, pas incidentit të dhunshëm të një dite më parë, ku qytetarë protestuan kundër ndërtimeve në zonë, duke ngritur pretendime për probleme me çështjet e pronësisë.
Ministri i Punëve të Brendshme, Besfort Lamallari, ka reaguar lidhur me incidentin e dhunshëm. Ai theksoi se ishte e papranueshme jo vetëm sjellja e rojeve private, por edhe indiferenca e pajustifikueshme e policisë së pranishme në vend.
Policia ka arrestuar rojën private të përplasur me protestuesin në Zvërnec. Gerald Biba akuzohet për veprat penale “Heqja e paligjshme e lirisë” dhe “Plagosja e lehtë me dashje”. Sipas policisë, 32-vjeçari ka goditur me grusht një person dhe më pas, në bashkëpunim me dy persona të tjerë të proceduar penalizisht, e ka tërhequr me forcë, duke i shkaktuar dëmtime të lehta trupore.
Reagon Rama
Kryeministri Edi Rama ka reaguar në lidhje me situatën në Zvërnec, duke lajmëruar se sot do të flasë për çështjen.
“Nesër e kam radhën unë për të folur për një projekt të jashtëzakonshëm për Shqipërinë, për të cilin punohet prej disa vitesh tanimë dhe i cili nuk ka asnjë lidhje me disa të pavërteta të mëdha, që janë hedhur në qarkullim ditët e fundit,” shkroi Rama, ndërsa përgëzoi policinë për reagimin ndaj rojes private të arrestuar. Ai shtoi: “E përgëzoj lidershipin e Policisë së Shtetit për reagimin e shpejtë e të saktë, qoftë ndaj atij grushti muskujsh pa tru me statusin e rojeve private të sigurisë, qoftë ndaj drejtuesve vendorë të policisë së Vlorës. Qasja e re e tolerancës zero ndaj çdo uniforme blu që cënon besimin e publikut, është e duhura.”
Rama njoftoi se më shumë detaje rreth projektit dhe sqarime për të vërtetat dhe të pavërtetat rreth tij do të jepen sot, në orën 10:00, drejtpërdrejtë.
Protesta e qytetarëve
Qytetarë të shumtë u mblodhën pasditen e sotme për të protestuar kundër ndërtimeve në zonat e mbrojtura. Tubimi nisi para Ministrisë së Brendshme dhe më pas u zhvendos para Kryeministrisë. Thirrjet kryesore të protestuesve ishin “Shqipëria e shqiptarëve”, “Shqipëria nuk shitet”, “Duam dorëheqje” dhe “Anuloni projektin”. Qytetarët kërkojnë të mos lejohen ndërtime që cënojnë zonat e mbrojtura.
Qytetarët kanë njoftuar një tjetër protestë për sot në orën 18:00, kundër ndërtimeve në zonat e mbrojtura, Paketën e Maleve dhe ofrimit të terapisë hormonale në QSUT.
“`