A po fillon flluska?! Numri i pronave të shitura ra me 35% në gjysmën e dytë të 2025, sipas BSH
Numri i pronave të shitura nga subjektet e monitoruara nga Banka e Shqipërisë pësoi një rënie në gjysmën e dytë të vitit të kaluar. Sipas Vrojtimit mbi Ecurinë e Tregut të Pasurive të Paluajtshme, numri i përgjithshëm i pronave të shitura ishte 1273, që përfaqëson një rënie prej 35% krahasuar me 1959 prona të shitura në gjysmën e parë të vitit.
Numri mesatar i pronave të shitura nga çdo subjekt gjatë gjashtëmujorit të dytë të vitit 2025 rezultoi rreth 8, duke shënuar një rënie të dukshme nga mesatarja prej 11 e raportuar gjatë gjysmës së parë të 2025.
Raporti i numrit të subjekteve që kanë kryer shitje ndaj numrit të përgjithshëm të përgjigjeve të vlefshme ishte 40%. Ky raport ka treguar një rënie graduale në dekadën e fundit, nga një maksimum prej rreth 70% i vlerësuar në gjysmën e parë të vitit 2017.
Rreth 37% e shitjeve të realizuara gjatë gjashtëmujorit të dytë 2025 në të gjithë territorin përfaqësohen nga prona të vendosura në zonat më të preferuara brenda qytetit, një peshë e ngjashme me periudhën paraardhëse.
31% e pronave të shitura ishin prona të ndërtuara në periferi të qytetit, krahasuar me 44% në periudhën e kaluar. Gjithashtu, rreth 32% e pronave të shitura ishin prona të ndërtuara jashtë qytetit, nga 21% në gjashtëmujorin e kaluar.
Megjithëse numri i pronave të shitura pësoi rënie, koha mesatare e shitjes së banesave në nivel vendi ra në 9.1 muaj, nga 11.6 muaj në vrojtimin e mëparshëm. Në Tiranë, koha mesatare e shitjes u ul ndjeshëm në 8.1 muaj nga 11.1 muaj në gjashtëmujorin e mëparshëm. Ndërkohë, koha mesatare për shitjet në zonat bregdetare u rrit në 9.9 muaj nga 8.7 muaj, ndërsa për zonat e tjera, kohëzgjatja e shitjes ishte më e ulët se në gjashtëmujorin e kaluar, duke rënë në 10.1 muaj nga 12.8 muaj.
Gjithashtu, pavarësisht rënies së shitjeve, numri i pronave të pashitura, si për banesat ashtu edhe për godinat tregtare, ka vijuar të shënojë rënie. Ky fenomen ka nisur të vërehet që prej fillimit të vitit 2016, duke treguar një rënie të vazhdueshme në secilin nga gjashtëmujorët e kësaj periudhe.
Tkurrja e inventarëve (pronave të pashitura) edhe në 6-mujorin II 2025, pavarësisht rënies së shitjeve, mund të interpretohet si pasojë e uljes së ofertës së pronave të reja për treg, në portofolin e ndërtuesve apo agjentëve të shitjeve të anketuar.
Rreth 46% e agjentëve kanë realizuar shitje me çmim të njëjtë ose deri në 5% më pak sesa çmimi i kërkuar. Pjesa tjetër kanë raportuar shitje me një çmim midis 5% deri në 20% më të ulët nga çmimi fillestar i kërkuar; vetëm një pjesë shumë e vogël ka shitur duke ulur çmimin me 30% ose më shumë.
Sipas agjentëve, rreth 61% e pronave për banim dhe atyre për përdorim tregtar të shitura prej tyre janë blerë me hua bankare. Nga këto, në 38% të rasteve, kredia ka mbuluar deri në 60% të vlerës.
Banka e Shqipërisë vlerëson se çmimet e banesave vazhduan rritjen me ritme të larta në gjashtëmujorin e dytë të vitit të kaluar. Indeksi Fischer, i përllogaritur nga Banka Qendrore, tregoi që çmimi mesatar i banesave të shitura gjatë periudhës u rrit me 11.7% krahasuar me gjashtëmujorin e kaluar dhe me 28% krahasuar me një vit më parë. Megjithatë, rritja vjetore e çmimeve u ngadalësua nga niveli prej 41.7% i raportuar në gjashtëmujorin e parë 2025.
Në veçanti për kryeqytetin, tregu shfaqet në ngadalësim të ndjeshëm. Indeksi i çmimeve për shitjet në Tiranë u raportua i pandryshuar ndaj gjashtëmujorit të mëparshëm dhe u rrit me 4.4% krahasuar me nivelin e një viti më parë. Rritja e çmimeve me bazë vjetore pësoi një rënie drastike nga niveli prej 32.6% i gjashtëmujorit të parë 2025.
Banka e Shqipërisë vlerëson se kontributin kryesor në rritjen e vlerës së indeksit të përgjithshëm të çmimeve e ka dhënë rritja në vlerën e indeksit të llogaritur për zonat e bregdetit.
Informacioni mbi ecurinë e çmimeve dhe vlerësimin e situatës nga ana e agjentëve në tregun e pasurive të paluajtshme merret nëpërmjet vrojtimit në terren të një kampioni të përbërë nga 230 subjekte, që kanë si aktivitet kryesor tregtimin e pronave të paluajtshme. Subjektet e zgjedhura janë agjentë të zyrave të tregtimit të pasurive të paluajtshme dhe shoqëri ndërtimi, shitjet e të cilave përfaqësojnë rreth 75%-80% të xhiros së të gjithë popullatës. Banka e Shqipërisë realizon hartimin e pyetësorit, si edhe hedhjen dhe përpunimin e rezultateve, ndërkohë që Instituti i Statistikave mbulon intervistimin në terren, proceset kryesore të kampionimit dhe kontrollin fizik të pyetësorëve të plotësuar.