“`html
Hysaj i sinqertë pas humbjes ndaj Luksemburgut: “Jam pak i lumtur dhe pak i trishtuar, e dimë që kemi probleme, disa mendjen te pushimi”
Elseid Hysaj nuk ka mundur të gëzohet siç do të dëshironte për 100 ndeshjet e tij me Kombëtaren, pasi Kombëtarja pësoi humbje edhe ndaj Luksemburgut.
“Do të doja ta festoja ndryshe këtë moment, por kështu ndodhi. Më vjen keq, jam pak i lumtur dhe pak i trishtuar, sepse duhet të fitonim. Më vjen keq edhe që stadiumi ishte pothuajse bosh. Por duhet të shikojmë përpara, sepse në jetën time gjithmonë kam menduar që të shohim përpara, duke rregulluar gabimet që kemi bërë.”
Mbrojtësi shtoi se ndeshjet e kaluara kanë qenë më të vështira se këto aktuale dhe se mund të ketë ndikuar fakti që disa lojtarë vijnë nga një kampionat i gjatë, ndërsa të tjerë kanë mendjen te pushimet, duke qenë se sezoni po vjen në fund.
“Por duhet të jemi profesionistë. E dimë që luajmë për kombin dhe kur vijmë këtu duhet të japim 100%. Kur ka një ndërrim trajneri pas një kompeticioni të madh, siç treguam që jemi në nivel të lartë duke arritur në “play-off”, edhe unë u kam thënë çunave që është moment i vështirë. Nuk e dinim nëse do të qëndronte trajneri apo jo, ishte konfuzion. U thashë që të jemi gati të ecim përpara, sepse do të jetë e vështirë pastaj, nëse të merr teposhtë, është e vështirë të kthehesh.”
Hysaj theksoi se ka folur me shokët e skuadrës dhe kanë parë që ka gjëra që nuk funksionojnë. Ai shpreson që të kuptojnë atë që dëshiron trajneri, duke pasur parasysh kohën e shkurtër në dispozicion.
“Nuk kishte kohë, ishim në fund të sezonit, duhej të vinim të jepnim maksimumin. Nga ana e tyre, ata kishin analizuar mirë ndeshjen, sepse kishin gjetur pikat e dobëta. Ndoshta në presing gabuam në dalje nga ana jonë. Ata patën një rast, ne kishim 2-3 raste për të shënuar, por nuk i shënuam, ashtu si me Izraelin. Por të gjithë e dimë që futbolli është i vështirë. Po nuk dhamë 110%, kushdo mund të na mposhtë dhe të na bëjë dëm. Të gjithë e dimë këtë gjë. Unë e di që nuk shënojmë, shpresoj që sulmuesit të arrijnë të zhbllokohen, të ndjejnë edhe ata ndjesinë e golit. Shpresoj të zhbllokojmë sa më shpejt këtë gjendje. Trajneri kërkon para, unë jam aty ku mundem,” tha Hysaj për “SuperSport”.
“`