Konflikti në Lindjen e Mesme: Kallas i cilëson sulmet ndaj shteteve të Gjirit si të papranueshme
Shefja e politikës së jashtme të Bashkimit Europian, Kaja Kallas, i ka cilësuar sulmet e fundit ndaj shteteve të Gjirit si të papranueshme. Këto komente u bënë gjatë një bisede telefonike me homologun e saj iranian, Abbas Araghchi, siç raportoi BBC.
“Zhvillova sot një bisedë telefonike me ministrin e Jashtëm të Iranit, Abbas Araghchi, duke diskutuar përshkallëzimin e fundit në Gjirin Persik dhe gjendjen e negociatave me Shtetet e Bashkuara të Amerikës. Gjithashtu, kam qenë në kontakt me ministrin e Jashtëm të Kuvajtit, Sheikh Jarrah Jaber Al-Ahmad Al-Sabah. Sulmet e ripërtërira ndaj vendeve të Gjirit Persik dhe infrastrukturës së tyre kritike janë të papranueshme”, shkroi Kallas në platformën X.
Ajo shtoi se “një kthim në luftë në shkallë të plotë do të sillte një kosto të jashtëzakonshme për të gjithë rajonin. Rruga diplomatike mbetet mënyra më e mirë për të dalë nga kjo luftë”.
Nga ana e tij, ministri i Punëve të Jashtme të Iranit, Araghchi, dënoi agresionin e Shteteve të Bashkuara.