Ndodh dhe kjo! Tifozët koreanë, të cilët nuk u lejuan të hynin në stadium me shishe tekila, e pinë atë së bashku me tifozët meksikanë.
Një moment i veçantë dhe jo i zakonshëm është regjistruar jashtë stadiumit në Guadalajara të Meksikës, duke treguar edhe një herë atmosferën unike që krijon Kupa e Botës mes tifozëve nga e gjithë bota.
Një grup tifozësh të Koresë së Jugut u ndalua përkohësisht nga hyrja në stadium pasi në çantat e tyre u gjet alkool. Ata kishin blerë tekila, pija tradicionale dhe një nga më të njohurat në Meksikë, vend bashkë-organizator i turneut.
Në vend që situata të krijonte tension, ajo u kthye në një skenë miqësore, ku tifozët koreanë dhe ata meksikanë përfunduan duke pirë së bashku dhe duke festuar jashtë stadiumit. Pamjet tregojnë tifozët duke shkëmbyer brohoritje dhe slogane, në një atmosferë festive dhe sportive.
Ngjarja është përshkruar nga shumë si një shembull i frymës së Kupës së Botës, ku rivaliteti në fushë shpesh zëvendësohet nga miqësia dhe bashkimi jashtë saj.