Trump kritikon Netanyahun: “Mizori, e tepërt!” / “Po vriten të pafajshëm, nëse nuk e bën dot punën…”
Presidenti amerikan Donald Trump ka kritikuar hapur kryeministrin izraelit Benjamin Netanyahu, duke deklaruar se ai duhet të jetë “përgjegjës për Libanin” dhe të lërë Sirinë “të merret me Hezbollahun”. Këto komente ai i bëri gjatë një takimi me Emirin e Katarit, Tamim bin Hamad Al Thani, në kuadër të samitit të G7-ës.
Trump theksoi se Hezbollahu mbetet një problem për rajonin, por sugjeroi se përgjigja e Izraelit ka qenë tepër e ashpër dhe mund të rrezikojë stabilitetin në Lindjen e Mesme.
Të dielën, Forcat Mbrojtëse të Izraelit (IDF) goditën një ndërtesë në Bejrut, duke lënë më shumë se një duzinë të plagosur dhe tre të vdekur. Izraeli deklaroi se operacioni synonte një qendër komande të Hezbollahut, ndërsa sulmi ndodhi në prag të shpalljes së një marrëveshjeje kornizë nga SHBA për t’i dhënë fund luftës me Iranin.
Trump u shpreh se ndërsa Hezbollahu është një problem, ai vë në dyshim metodat e Netanyahut. “Izraeli lufton kundër Hezbollahut prej kohësh dhe shumë njerëz po vriten,” tha ai për gazetarët në Évian, Francë. “Nuk ka nevojë të shembësh një pallat të tërë apartamentesh për të gjetur dikë, sepse aty jetojnë shumë njerëz që nuk janë të gjithë pjesë e Hezbollahut.”
Presidenti amerikan sugjeroi se Presidenti i Sirisë, Ahmed al-Sharaa, është “shumë i aftë” për të trajtuar Hezbollahun, duke e cilësuar atë “shumë të mirë për mua”. Ai shtoi se nëse Izraeli nuk mund t’i kryejë operacionet “pa vrarë të gjithë të tjerët,” atëherë al-Sharaa do ta bëjë punën.
I pyetur nëse ishte i zhgënjyer nga veprimet e Netanyahut, Trump u përgjigj negativisht, duke theksuar se kanë një marrëdhënie të shkëlqyer. Megjithatë, ai shtoi: “Nuk më pëlqeu fakti që ai kreu një sulm me dronë të vegjël në Liban… ishte mizori. Kjo ishte e tepërt. Tani Bibi duhet të jetë më i përgjegjshëm në lidhje me Libanin.”
Trump përfundoi duke thënë se, nga të gjitha vendet e prekura nga konflikti, “ato janë trajtuar më keq dhe nuk mund të mbrojnë veten”.