Pezheskian: Mundësia e memorandumit me SHBA-në nuk duhet të lihet pa u shfrytëzuar
Presidenti iranian, Masoud Pezheskian, e cilësoi memorandumin e mirëkuptimit me Shtetet e Bashkuara, i cili do të nënshkruhet zyrtarisht në Zvicër të premten, si një fitore diplomatike për vendin e tij.
“Prandaj, nuk duhet ta lëmë këtë mundësi, e cila mund ta nxjerrë vendin nga situata aktuale, të mbetet e pashfrytëzuar”, tha Pezheskian, sipas agjencisë së lajmeve ISNA. Ai shtoi se mundësi të tilla janë të kufizuara dhe mund të mos vijnë përsëri.
Pezheskian, i cili konsiderohet si një figurë e moderuar, ka mbështetur vazhdimisht diplomacinë dhe ka shprehur mbështetje për ekipin negociator të Iranit, të udhëhequr nga Kryetari i Parlamentit Mohammad Bagher Ghalibaf dhe Ministri i Jashtëm Abbas Araghchi.
Presidenti iranian shprehu shpresën se marrëveshja paraprake mes Uashingtonit dhe Teheranit do të zgjidhë shumë nga problemet e vendit të tij dhe do të sjellë një epokë të re.
Për shkak të sanksioneve ndërkombëtare, Irani ka qenë në prag të një krize të rëndë ekonomike për vite me radhë, situatë e cila u përkeqësua pas shpërthimit të luftës në fund të shkurtit. Teherani shpreson që heqja e sanksioneve do të çojë në rimëkëmbjen ekonomike të vendit.