“`html
AAPSK: Të ardhurat nga qiradhënia arrijnë 221 milionë lekë në vitin 2025
Agjencia e Administrimit të Pasurive të Sekuestruara dhe të Konfiskuara (AAPSK) mori pjesë në Simpoziumin Kombëtar “Nga Konfiskimi te Interesi Publik: Sfidat dhe Perspektivat e Administrimit të Aseteve të Konfiskuara”, organizuar në Tiranë. Në event morën pjesë përfaqësues të sistemit gjyqësor, institucioneve ligjzbatuese, partnerëve ndërkombëtarë dhe ekspertëve të fushës.
Gjatë fjalës së tyre, përfaqësuesit e AAPSK theksuan se procesi i konfiskimit nuk mbaron me vendimin e gjykatës. Ai vijon me një fazë po aq të rëndësishme, atë të administrimit të aseteve. Qëllimi është garantimi i ruajtjes së vlerës së tyre, mbrojtja e interesit publik dhe parandalimi i rikthimit të produkteve të veprimtarisë kriminale tek autorët.
“AAPSK nuk është thjesht një institucion administrues, por një pjesë integrale e mekanizmit të drejtësisë, që kontribuon drejtpërdrejt në forcimin e luftës kundër krimit të organizuar, korrupsionit dhe pastrimit të parave,” theksuan ata.
Duke prezantuar zhvillimet e viteve të fundit, përfaqësuesit u ndalën te transformimi institucional i AAPSK-së. Ky transformim është realizuar përmes modernizimit të procedurave, rritjes së transparencës, forcimit të bashkëpunimit me institucionet vendase dhe partnerët ndërkombëtarë, si dhe garantimit të administrimit sa më efikas të pasurive të sekuestruara dhe të konfiskuara.
Në këtë kuadër, u bë e ditur se të ardhurat nga administrimi i pasurive vijojnë të rriten nga viti në vit. Të ardhurat nga qiradhënia e pasurive nën administrim arritën në rreth 159 milionë lekë gjatë vitit 2024, ndërsa në vitin 2025 u rritën në 221 milionë lekë, duke shënuar një rritje prej rreth 39%.
Një pjesë e konsiderueshme e këtyre fondeve është përdorur për të mbështetur institucionet e drejtësisë dhe sigurisë. Kjo tregon se pasuritë e konfiskuara mund të shndërrohen në një burim të rëndësishëm për forcimin e vetë shtetit.
Një tjetër prioritet i evidentuar ishte përdorimi social i aseteve të konfiskuara. Objektivi nuk është vetëm administrimi ekonomik i tyre, por edhe krijimi i vlerës për komunitetet. Kjo synon të bëhet përmes shndërrimit të këtyre pasurive në qendra komunitare, institucione sociale, hapësira edukimi dhe shërbime publike, në përputhje me praktikat më të mira evropiane.
Në fjalën e mbajtur, përfaqësuesit e AAPSK evidentuan gjithashtu sfidat që shoqërojnë administrimin e pasurive të sekuestruara. Këto sfida përfshijnë mirëmbajtjen e tyre, administrimin e bizneseve në funksion, vlerësimin profesional të aseteve dhe nevojën për ekspertizë të specializuar.
Sipas AAPSK, suksesi i sistemit varet nga bashkëpunimi i ngushtë ndërinstitucional mes organeve ligjzbatuese, Prokurorisë së Posaçme, gjykatave, Zyrës së Rikuperimit të Aseteve, institucioneve financiare dhe vetë AAPSK-së. U veçua roli i rëndësishëm i gjyqësorit në garantimin e një administrimi efektiv të pasurive.
Në përmbyllje, përfaqësuesit e AAPSK theksuan se integrimi evropian kërkon jo vetëm harmonizimin e legjislacionit, por edhe ngritjen e kapaciteteve institucionale sipas standardeve të Bashkimit Evropian. Në këtë kuadër, AAPSK ka zgjeruar bashkëpunimin me partnerë ndërkombëtarë dhe institucione homologe në Itali, Francë, Mbretërinë e Bashkuar dhe Kosovë. Gjithashtu, ka bashkëpunuar me organizata si GIZ, UNODC dhe UNICEF, me synimin për të ndërtuar modele moderne administrimi dhe për të rritur profesionalizmin institucional.
Simpoziumi solli në një panel të përbashkët përfaqësues të sistemit gjyqësor, AAPSK-së, Zyrës së Rikuperimit të Aseteve (ARO), Partners Albania dhe ekspertëve ndërkombëtarë. Ata diskutuan sfidat e konfiskimit, administrimit dhe ripërdorimit të aseteve në interes publik, si dhe nevojën për forcimin e bashkëpunimit ndërinstitucional dhe përafrimin me standardet evropiane.
“`