Evakuohen 2,500 marinarë të bllokuar në Ngushticën e Hormuzit, operacioni pezullohet pas sulmit ndaj një anijeje
Organizata Ndërkombëtare Detare (IMO) njoftoi të premten se kishte evakuuar rreth 2,500 marinarë të bllokuar në Ngushticën e Hormuzit. Operacioni u pezullua përkohësisht pasi një anije mallrash u sulmua të enjten.
Sekretari i Përgjithshëm i IMO-s, Arsenio Dominguez, sqaroi se operacioni humanitar kishte filluar në fillim të javës dhe përfshinte të paktën 115 anije të cilat ndodheshin në zonën e konfliktit. Sipas tij, organizata me seli në Londër po zhvillon konsultime me Iranin, Omanin dhe Shtetet e Bashkuara për të siguruar garanci të reja sigurie, me qëllim rifillimin sa më shpejt të operacionit të evakuimit.
Një ditë më parë, IMO kishte njoftuar se synonte të evakuonte më shumë se 11,000 marinarë që kishin mbetur të bllokuar në këtë rrugë detare strategjike.
Ngushtica e Hormuzit ka qenë e bllokuar për javë të tëra, pas përshkallëzimit të tensioneve mes Iranit dhe Shteteve të Bashkuara. Situata u përkeqësua pasi Irani nisi kërcënime dhe sulme ndaj anijeve tregtare, ndërsa SHBA vendosi një bllokadë ndaj porteve iraniane. Sipas të dhënave të IMO-s, që nga fillimi i konfliktit janë sulmuar mbi 40 anije tregtare, ndërsa të paktën 14 marinarë kanë humbur jetën në incidentet e regjistruara në rajon.