“`html
Tatimet publikojnë udhëzuesin: Procedurat e aplikimit për kompensimin e TVSH-së te fermeri
Nga 1 korriku kanë nisur aplikimet për rimbursimin e TVSH-së për fermerët, duke u realizuar nëpërmjet autofaturave të lëshuara nga grumbulluesit, përpunuesit apo agroturizmi i certifikuar.
Administrata Tatimore ka publikuar një udhëzues të detajuar për procedurat që duhet të ndjekin fermerët për të aplikuar. Aplikimet do të kryhen nëpërmjet platformës e-Filing. Për këtë, fermeri duhet të jetë i pajisur me NIPT (Numër Identifikimi Personi) dhe të verifikojë autofaturat që do t’i shfaqen në sistem.
Sipas të dhënave të Administratës Tatimore, numri total i fermerëve të pajisur me NIPT është 113,470.
Procedurat për aplikim sipas udhëzuesit:
- Fermerët e pajisur me NIPT duhet të identifikohen në e-Filing, duke zgjedhur te menuja “Çështje e re” kërkesën “Për rimbursim të fermerëve”.
- Pasi të kenë hyrë në e-Filing, fermerët duhet të plotësojnë te rubrika “Detajet e bankës” të dhënat e llogarisë bankare me numrin IBAN.
- Pas plotësimit të kërkesës, sistemi do t’u shfaqë fermerëve autofaturat e periudhës janar-qershor, të cilat ata duhet t’i identifikojnë.
- Pasi të identifikohen autofaturat, sistemi do të llogarisë automatikisht shumën totale të tyre dhe shumën e kompensimit prej 10%.
- Sistemi gjithashtu kontrollon afatin, faturat dhe llogarinë bankare përpara se të pranojë kërkesën.
- Kërkesa do të marrë statusin “Në proces”, ndërsa përgjigjen fermeri mund ta gjejë te menuja “Të dorëzuara”.
- Me kërkesë të Administratës Tatimore, mund të bashkëngjiten edhe dokumente shtesë, sipas informacionit të kërkuar.
Për të përfituar kompensimin, fermeri duhet të jetë i pajisur me numër identifikimi (NIPT) nga Administrata Tatimore, pa pasur detyrimin për deklarim periodik të TVSH-së. Qarkullimi vjetor nuk duhet të tejkalojë kufirin minimal të regjistrimit për TVSH.
Fermerët që shesin produktet e tyre bujqësore/blegtoralë nuk bëhen automatikisht subjekt i TVSH-së nëse qarkullimi i tyre vjetor është deri në 10 milionë lekë. Nëse qarkullimi kalon 10 milionë lekë, fermeri duhet të regjistrohet si subjekt i TVSH-së (tatimpagues i zakonshëm).
Aplikimi do të bllokohet në rast se fermeri rezulton i regjistruar me TVSH, nuk zgjedh faturat e shfaqura në sistem, nuk jep të dhënat e llogarisë bankare me IBAN, rezulton me status pasiv në tatime, ose aplikon pas përfundimit të afatit.
Synimi i skemës:
Qëllimi i kësaj skeme është të rimbursojë 10% TVSH-në që fermeri ka paguar për inputet bujqësore, si plehrat kimike, farat dhe fidanët. Kjo masë synon uljen e kostove të prodhimit dhe nxitjen e formalizimit të transaksioneve në sektor.
Prej vitit 2019 deri në dhjetor 2021, TVSH-ja për inputet bujqësore ka qenë zero. Megjithatë, nga 1 janari 2022, pas miratimit të ndryshimeve fiskale, hyri në fuqi vendosja e TVSH-së 10% në çmimet e inputeve bujqësore.
Shoqata e Blegtorëve Prodhues të Qumështit ka ngritur shqetësimin se rreth 70% e qumështit të shitur te përpunuesit bëhet pa autofaturë. Shoqata propozon kompensimin e TVSH-së 10% me faturim direkt, në vend të autofaturës.
KLIKONI KETU PER TE PARE UDHEZUESIN
“`