“`html
Shteti preferon drejtues, numri i tyre rritet me 18% në vitin 2025, ndërsa nëpunësit pakësohen
Punësimi në sektorin publik u zgjerua më tej gjatë vitit 2025, por duket se pjesa më e madhe e rritjes ka ardhur nga pozicionet drejtuese.
Sipas të dhënave të INSTAT, numri total i të punësuarve në shtet arriti në 185,386 persona, nga 182,430 një vit më parë, duke u shtuar me 2,956 punonjës, ose 1.6%.
Rritja më e fortë është regjistruar te kategoria “ligjvënës, nëpunës të lartë dhe drejtues”, e cila u zgjerua me 18% brenda një viti. Në vitin 2025, kjo kategori numëronte 24,244 të punësuar, nga 20,532 në 2024. Krahasuar me vitin 2021, numri i tyre është rritur me mbi 7,200 persona, ose 43%.
Ndërkohë, specialistët, që mbeten grupi më i madh në administratën shtetërore, u rritën lehtë në 77,465 persona, nga 75,817 në vitin 2024. Ata përbëjnë rreth 42% të totalit të të punësuarve në sektorin shtetëror.
Në të kundërt, kategoria e teknikëve dhe ndihmës specialistëve ra me 7.3% në 2025, duke zbritur në 32,773 të punësuar.
Rënie edhe më të fortë shënuan nëpunësit e thjeshtë, numri i të cilëve u ul në 11,465, nga 13,286 një vit më parë. Krahasuar me vitin 2021, kjo kategori është tkurrur me rreth 25%.
Të dhënat tregojnë një zhvendosje të strukturës së punësimit në shtet drejt pozicioneve drejtuese dhe profesioneve më të kualifikuara, ndërsa rolet mbështetëse dhe administrative të thjeshta po bien.
Paralelisht, numri i punëtorëve u rrit në 39,439 në vitin 2025, niveli më i lartë i periudhës 2021-2025.
Të dhënat tregojnë se administrata shtetërore është bërë më “hierarkike”, duke u rritur numri i drejtuesve dhe i pozicioneve menaxheriale në raport me stafin mbështetës. Kjo shihet nga rritja e fortë e ligjvënësve, nëpunësve të lartë dhe drejtuesve (+18% në një vit), ndërsa teknikët dhe nëpunësit e thjeshtë kanë rënë.
Kjo zhvendosje po vjen edhe si pasojë e ristrukturimit të administratës, ku shumë detyra teknike ose administrative janë automatizuar apo janë kaluar në shërbime të digjitalizuara, duke zëvendësuar vendet e thjeshta të punës me drejtues.
Mirëpo, teksa digjitalizimi ka përparuar me shpejtësi në të gjitha drejtimet, kjo po sjell më shumë kosto për qytetarët, pasi numri i punonjësve në sektorin shtetëror, në vend që të ulet, po shtohet vit pas viti.
Duke qenë se shtesa po vjen për pozicionet drejtuese, kjo rëndon më shumë shpenzimet për paga që paguhen nga taksapaguesit.
“`