“`html
2025: Rritet prodhimi i qumështit të lopës, bie i dhive dhe deleve
Industria e përpunimit të qumështit në Shqipëri shënoi një ecuri pozitive gjatë vitit 2025 sa i përket vëllimit të përgjithshëm të grumbulluar. Megjithatë, shifrat e detajuara zbulojnë një rënie të ndjeshme në sektorin e bagëtive të imëta.
Sipas të dhënave më të fundit të publikuara nga Instituti i Statistikave (INSTAT), sasia gjithsej e qumështit të grumbulluar në subjektet përpunuese arriti në rreth 101 mijë tonë, duke regjistruar një rritje prej 6,9% krahasuar me vitin 2024. Kjo rritje është mbështetur thuajse ekskluzivisht nga performanca e qumështit të lopës, i cili mbetet shtylla kryesore e industrisë me 84 mijë tonë të grumbulluara, ose një rritje prej 12,5%.
Në kahun e kundërt të kësaj ecurie, sektori i bagëtive të imëta ka regjistruar rënie:
- Qumështi i deles shënoi një rënie drastike prej 21,1%, duke zbritur në 9 mijë tonë.
- Qumështi i dhisë gjithashtu shënoi një rënie prej 4,3%, duke u ndalur në rreth 8 mijë tonë.
Kjo tendencë rënëse është pasqyruar edhe në nënproduktet e përpunuara. Prodhimi i djathit, ndonëse u rrit me 1,9% në total falë performancës së fortë të produkteve nga qumështi i lopës (+9,9%), regjistroi rënie në produktet nga qumështi i imët:
- Prodhimi i djathit nga qumështi i deles ra me 21,8%.
- Ai nga qumështi i dhisë shënoi një rënie prej 1,7%.
INSTAT i grumbulloi të dhënat nga Anketa e Qumështit dhe Nënprodukteve të tij për vitin 2025, e cila monitoron ndërmarrjet aktive në përpunimin e qumështit në vend.
Me gjithë rritjen e prodhimit të regjistruar, çmimet e bulmetit shënuan rritje të mëtejshme, duke bërë që Shqipëria të renditet ndër vendet me çmimet më të larta në Europë për këtë kategori produktesh. Sipas të dhënave të Eurostat, Shqipëria u rendit e treta pas Zvicrës dhe Norvegjisë.
Të dhënat e Eurostat tregojnë se çmimet e qumështit dhe bulmetrave në Shqipëri ishin 135.6% e mesatares së BE në vitin 2025 (BE27=100), pothuajse në të njëjtin nivel me Norvegjinë (135.7%). Shqipëria ka pasur një rritje të fortë të çmimeve gjatë katër viteve të fundit, duke kaluar nga indeksi 112.3 në vitin 2022 në 135.6 vitin e kaluar. Kjo ka bërë që çmimet e qumështit dhe vezëve të jenë 36% më të larta se mesatarja e BE-së.
Ndryshe nga vendet e pasura si Zvicra dhe Norvegjia, ku çmimet e larta shoqërohen me paga dhe fuqi blerëse më të lartë, në Shqipëri ky nivel çmimesh ka një peshë më të rëndë në buxhetet familjare. Ky fenomen është veçanërisht i ndjeshëm duke marrë parasysh se qumështi, nënproduktet e tij dhe vezët janë pjesë e shportës ushqimore bazë dhe lidhen me shëndetin e të gjitha moshave.
“`