Franca ndalon rrjetet sociale për fëmijët nën 15 vjeç, ligji i parë i këtij lloji në BE
Franca është bërë vendi i parë në Bashkimin Europian që miraton një ligj që ndalon aksesin në platformat e mediave sociale për fëmijët nën moshën 15 vjeç. Projektligji u miratua të martën nga Parlamenti francez. Fillimisht, ai u miratua në Senat me 243 vota pro dhe 2 kundër, ndërsa më pas mori miratimin edhe në Asamblenë Kombëtare, dhoma e ulët e parlamentit, me 279 vota pro dhe 81 kundër.
Masa është mbështetur nga presidenti Emmanuel Macron, i cili synon që ajo të zbatohet që në fillim të vitit të ri shkollor në shtator. Qëllimi kryesor është mbrojtja e shëndetit mendor dhe mirëqenies së të miturve.
Ministrja e Medias Dixhitale, Anne Le Havre, deklaroi: “Ne francezët do të duhet të gjithë të vërtetojmë moshën tonë për katër muaj. Nëse jemi nën 15 vjeç, llogaria në platformë do të mbyllet”.
Sipas ligjit:
- Për llogaritë e reja, ndalimi do të nisë të zbatohet nga 1 shtatori.
- Për llogaritë ekzistuese, ndalimi do të hyjë në fuqi pas përfundimit të periudhës së verifikimit të moshës, më 1 janar 2027.
Megjithëse disa deputetë kanë shprehur dyshime për zbatimin praktik të kësaj mase në një kohë kaq të shkurtër, qeveria franceze këmbëngul se sistemi i verifikimit të moshës do të jetë funksional.
Ligji parashikon gjithashtu ndalimin e përdorimit të telefonave celularë në shkollat e mesme, duke zgjeruar një masë që tashmë aplikohet në shkollat fillore dhe ato të mesme. Rregulloret e brendshme të shkollave mund të përcaktojnë raste përjashtimore.
Teksti ligjor nuk parashikon ndëshkime për fëmijët apo prindërit e tyre. Përgjegjësia do t’u kalojë platformave të rrjeteve sociale, të cilat do të duhet të verifikojnë moshën e përdoruesve.
Komisioni Europian ka prezantuar në prill një aplikacion europian për verifikimin e moshës, ndërsa kompani private kanë zhvilluar gjithashtu teknologji të ngjashme për kontrollin e aksesit të të miturve në internet.