“`html
Miratohet marrëveshja me Maqedoninë e Veriut, lehtësohet kalimi kufitar për udhëtarët dhe mallrat
Këshilli i Ministrave ka miratuar disa vendime të rëndësishme në mbledhjen e sotme, duke përfshirë lehtësimin e kalimit kufitar me Maqedoninë e Veriut dhe trajtimin ekonomik të familjarëve të punonjësve të policisë që kanë humbur jetën në krye të detyrës.
Ministri i Punëve të Brendshme, Besfort Lamallari, njoftoi pas përfundimit të mbledhjes se në fund të qershorit është nënshkruar marrëveshja me Maqedoninë e Veriut për pikat e përbashkëta të kalimit kufitar. Kjo marrëveshje synon thjeshtimin e procedurave për qytetarët dhe transportin e mallrave mes dy vendeve.
“Marrëveshja do t’i dërgohet Kuvendit për ratifikim. Deri në përfundimin e këtij procesi, do të shfrytëzohet periudha e testimit për të lehtësuar në praktikë kalimin e udhëtarëve dhe qarkullimin e mallrave”, tha ministri Lamallari.
Ai gjithashtu informoi se janë miratuar dy vendime për trajtimin ekonomik të familjeve të punonjësve të policisë të rënë në detyrë. Sipas këtyre vendimeve, familjarët do të përfitojnë deri në 10 paga mujore bruto, si dhe pensionin përkatës. Gjithashtu, bashkëshortet dhe fëmijët e mitur të punonjësve të policisë të rënë në detyrë do të pajisen me banesa falas.
Ministri i Mbrojtjes, Ermal Nufi, duke iu përgjigjur pyetjeve të gazetarëve, sqaroi çështje të ndryshme. Ai foli rreth përdorimit të fondeve prej 300 milionë USD nga marrëveshja e huasë me SHBA, rritjes së kërkesave për rekrutime në Forcat e Armatosura, si dhe vendimmarrjes për dërgimin e trupave shqiptare në Gaza.
“Marrëveshja e huasë me Shtetet e Bashkuara të Amerikës do të përdoret për blerjen e mjeteve dhe pajisjeve të reja, me qëllim modernizimin e kapaciteteve të mbrojtjes në përputhje me angazhimet e NATOS-s. Ky është një plan zhvillimi afatgjatë dhe investimet do të jenë në harmoni me angazhimet e deklaruara”, tha ministri Nufi.
Ai shtoi se kërkesat për t’u bërë pjesë e Forcave të Armatosura janë rritur me mbi 90%, duke lidhur këtë rritje interesi me përmirësimin e pagave dhe kushteve të shërbimit. Një rritje e veçantë e kërkesave është vënë re edhe nga gratë.
Lidhur me pjesëmarrjen në misione ndërkombëtare në kuadër të Bordit të Paqes dhe mundësinë e dërgimit të trupave në Gaza, ministri i Mbrojtjes pritet që javën e ardhshme Këshilli i Ministrave të marrë një vendim. “Më herët është zhvilluar një mision për shqyrtimin e situatës, ndërsa më pas pritet angazhimi i drejtuesve të shtabit për të kryer vlerësime konkrete mbi mundësinë e dërgimit të trupave shqiptare”, përfundoi ministri i Mbrojtjes.
“`