“`html
Kaosi dhe zhurma bllokojnë punimet: Mbyllet sesioni parlamentar, PS miraton e vetme të gjitha ligjet, deputetët rikthehen në Shtator
TIRANË – Seanca e Kuvendit, e cila ishte parashikuar të ishte maratonë, u mbyll mes tensioneve dhe debateve brenda dhe jashtë sallës. Ndërkohë që dhjetra qytetarë protestonin në hyrje të Kuvendit që prej mëngjesit, ku nuk munguan as persona të lënduar, deputetët e opozitës u ngritën në këmbë duke bllokuar foltoren dhe duke krijuar zhurmë, duke goditur tavolinat me shuplaka dhe bidonë plastikë.
Kjo ishte forma e tyre e protestës për të mos kaluar në votim të drejtpërdrejtë, siç propozohej nga Partia Socialiste (PS), duke shmangur diskutimet pasi opozita nuk po lironte foltoren. Situata u tensionua edhe më shumë kur kryeministri Edi Rama mbërriti në sallë, ndërsa Gazment Bardhi hodhi ujë në drejtim të tij.
Mes zhurmës, mazhoranca qeverisëse miratoi projektligjet një nga një. Sakaq, u zgjodh edhe kreu i ri i Këshillit të Lartë të Drejtësisë (KLD), Ismail Shehu.
U miratuan këto projektrezoluta:
- Projektrezolutë “Për vlerësimin e veprimtarisë së Këshillit të Lartë Gjyqësor për vitin 2025”. Votimi: 84 pro, 1 abstenim, 2 kundër.
- Projektrezolutë “Për vlerësimin e veprimtarisë së Këshillit të Lartë të Prokurorisë për vitin 2025”. Votimi: 83 pro, 1 abstenim, 3 kundër.
- Projektrezolutë “Për vlerësimin e veprimtarisë së Kontrollit të Lartë të Shtetit për vitin 2025”. Votimi: 82 pro, 1 abstenim, 0 kundër.
- Projektrezolutë “Për vlerësimin e veprimtarisë së Prokurorisë së Përgjithshme për vitin 2025”. Votimi: 83 pro, 1 abstenim, 3 kundër.
- Projektrezolutë “Për vlerësimin e veprimtarisë së Strukturës së Posaçme kundër Korrupsionit dhe Krimit të Organizuar për vitin 2025”. Votimi: 83 pro, 1 abstenim, 1 kundër.
- Projektrezolutë “Për vlerësimin e veprimtarisë së Avokatit të Popullit për vitin 2025”. Votimi: 83 pro, 0 abstenim, 0 kundër.
- Projektrezolutë “Për vlerësimin e veprimtarisë së Inspektorit të Lartë të Drejtësisë për vitin 2025”. Votimi: 81 pro, 1 abstenim, 3 kundër.
Gjithashtu u miratuan:
- Akt normativ nr. 2, datë 30.6.2026, “Për disa ndryshime dhe shtesa në ligjin nr. 87/2025, “Për buxhetin e vitit 2026””. Votimi: 82 pro, 0 abstenim, 3 kundër.
- Akt normativ nr. 3, datë 6.7.2026, “Për financimin e pjesshëm të organizimit të një aktiviteti kulturor-turistik me përmasa ndërkombëtare”. Votimi: 80 pro, 0 abstenim, 6 kundër.
- Projektligji “Për grupimet ekonomike me interes evropian”. Votimi: 82 pro, 0 abstenim, 5 kundër.
- Projektligji “Për shoqëritë evropiane të bashkëpunimit (SHEB)”. Votimi: 83 pro, 0 abstenim, 1 kundër.
- Projektligji “Për statutin e shoqërive evropiane (SE)”. Votimi: 83 pro, 0 abstenim, 4 kundër.
- Projektligji “Për mbylljen e shoqërive tregtare me kapital shtetëror në likuidim”. Votimi: 79 pro, 0 abstenim, 3 kundër.
- Projektligji “Për kërkesat e transparencës për emetuesit e titujve”. Votimi: 83 pro, 0 abstenim, 3 kundër.
“`